Nura aýdany boıynsha 2013 jyldan bastap turǵyn úı qurylysynyń qarqyny baıaýlap, sonyń saldarynan baspanaǵa muqtaj turǵyndardyń qatary óse túsken bolatyn. Endi bul olqylyqtyń ornyn toltyratyn da kez keldi. Taıaýda aýdan ortalyǵynda árqaısysy 2 páterli 20 úı qurylysynyń alǵashqy qadasy qaǵyldy.
Saltanatty rásim ústinde aýdan ákimi Nıqanbaı Omarhanov Nura aýdanynyń 90 jyldyq mereıtoıy qarsańynda 88 páterdiń kilti turǵyndarǵa tapsyrylatynyn aıtty. Aýdan ákimi munyń ózi Elbasynyń «Prezıdenttiń bes áleýmettik bastamasynda» aıtylǵan mindetterdiń Nura jerinde júzege asa bastaǵanynyń jarqyn kórinisi ekendigin atap ótti.
Bolashaqta qurylys alańyna aınalatyn jerge qada qaǵylǵannan keıin aýyl aqsaqaly Isaı qajy Qaıbolda aq batasyn berdi. Qurylysty júrgizetin «Nur Invest grýpp» seriktestigi men «Kazdorstroıteh» fırmasynyń basshylaryna aqsaqaldar qaýymy sáttilik tilep, senim bildirdi.
– «Nurly jer» baǵdarlamasy aıasynda Qaraǵandy oblysy boıynsha 332 páter salynatyn bolsa, onyń 40 páteri Nura aýdanyna tıesili. Jalpy kólemi 3314 sharshy metr aýmaqqa turǵyzylatyn bul úılerge respýblıkalyq jáne oblystyq bıýdjetten 481 mln teńge jáne onyń ınfraqurylymyn salýǵa 37 mln teńge qarajat bólingen, – dedi Qaraǵandy oblysynyń sáýlet jáne qala qurylysy basqarmasynyń bólim basshysy Ashat Makenbaev. Búginde Nura aýdanynyń ortalyǵy kórer kózge kórkeıip, órkendep keledi. Turǵyndardyń jaǵdaıyn jaqsartý maqsatynda aýdan boıynsha 50 shaqyrymnan astam dıodty shamdar jelisi ornatylǵan. Munyń ózi elektr qýatyn únemdeýge zor septigin tıgizedi. Sonymen qatar avtomobıl joldary jóndelip, aýyz sý problemasyn oń sheshýdiń de joly tabylǵan.
Qaırat ÁBILDA, «Egemen Qazaqstan»
Qaraǵandy oblysy, Nura aýdany