Aldaǵy jeksenbi kúni qazaqtyń shoıyn judyryq ıesi, Rıo Olımpıadasynyń chempıony Danııar Eleýsinov AQSh-tyń Nıý-Iork qalasyndaǵy Barclays Center arenasynda óziniń kásipqoı bokstaǵy debıýttik kezdesýin ótkizedi. О́zderińiz biletindeı, Eleýsinov naýryz aıynda kásipqoı boksqa aýysqandyǵyn málimdep, brıtanııalyq tanymal promoýter Eddı Hırnmen úsh jyldyq kelisimshartqa qol qoıǵan edi.
D.Eleýsinov áýesqoı boksshy alýy tıis bolǵan júlde men marapattyń barlyǵyn enshiledi. Bylaı qarasańyz, boksshy retinde ókinishine qaraǵanda, qýanyshy basym. Endeshe onyń sporttyq ǵumyrynyń kelesi kezeńine ımenbeı aıaq basýyna esh kedergi joq-tyn. Boks álemine jańalyq bolyp kelip, alshańdaı basqan Alash balasynyń arynyn menmin degen promoýterlik ortalyqtardyń kórmeı qalýy taǵy múmkin emes. Biraq Danııar eshkimge eleýsiz jatqan, aty men ataǵy, dańqy men dabyrasy joq aýstralııalyq kompanııamen kelisimshartqa otyrǵanda ishimiz bir qylp ete qalǵanyn nesine jasyraıyq?! Sol kúmán beker emes eken, shıki kelisimnen aqyry shı shyǵyp tyndy. Endi, mine, ekinshi ret kásipqoı bokstyń dámin tatýǵa, tórt beldiktiń barlyǵyn ıelenýge bel býyp otyr.
Eleýsinovtiń kásipqoı bokstaǵy tuńǵysh jekpe-jegi 29 sáýir kúni Gennadıı Golovkınniń eks-qarsylasy Denıel Djeıkobstyń qatysýymen bolatyn boks keshinde ótedi. Qarsylasy amerıkalyq boksshy – Noa Kıdd. Búginge deıin tórt kezdesý ótkizip, úsheýinde jeńiske jetse, bireýinde teń túsken. 23 jastaǵy Kıdd kásipqoı bokstyń álippesin osydan eki jyl buryn bastaǵan. Eleýsinovke qaraǵanda tájirıbesi mol. Ol sońǵy aıqasyn ótken jyldyń jeltoqsan aıynda ótkizip, qarsylasyn tehnıkalyq nokaýtpen jeńgen. Aldyn ala málimet boıynsha Eleýsinov-Kıdd aıqasy 6 raýndqa josparlanǵan. Kásipqoı boksta reıtıngte tez kóterilý úshin raýnd sany mańyzdyraq. Eleýsinovtiń debıýti úshin 6 raýndtyq jekpe-jek jaqsy kórsetkish. Degenmen 1,5 jyldan asa boks praktıkasy joq jáne kásipqoı bokstyń qyry men syryn meńgere qoımaǵan Danııar úshin 6 raýndtyq aıqas qıyndyq týǵyzýy múmkin. Ádette, kásipqoı boksqa endi qadam basqan boksshylar qarymy men fızıkalyq múmkindigin tekserip alý úshin 4 raýndtyq jekpe-jekten bastaıtyn.
Jekpe-jek aldynda D.Eleýsinov qarsylasy týraly azdap zerttegenin, soǵan qaraı jospar quryp qoıǵanyn jetkizdi. «Shynymdy aıtsam, qarsylasym týraly tolyq bilmeımin. О́ıtkeni ol týraly ınternette aqparattar óte az. Onyń buǵan deıingi jekpe-jekteriniń tek vıdeo úzindisin qarap shyqtym. Baıqaǵanymdaı, ol oń qolymen kóp soqqy jasaıdy eken jáne stıli de túsiniksiz. Dese de, qarsylasym joǵary deńgeıdegi boksshy dep aıta almaımyn. Sebebi kásipqoı bokstaǵy alǵashqy aıqasqa joǵary deńgeıdegi qarsylasty tańdamaıdy ǵoı. Biraq sonda da saq bolǵan jón. Jekpe-jek taǵdyryn bir soqqy sheship ketýi de ábden múmkin. Osyǵan baılanysty ákem ekeýmiz jekpe-jekke birneshe jospar quryp qoıdyq. Buıyrsa, jeńiske jetý úshin bar kúshimdi, tájirıbemdi qoldanatyn bolamyn», deıdi Eleýsinov.
Sondaı-aq amerıkalyq Noa Kıdd te otandasymyz týraly óz pikirin aıtyp ótti. «Men buǵan deıin Eleýsinovti tanyǵan joqpyn. Qarsylasym atanǵan soń ol týraly málimet izdeı bastadym. Menińshe, ol óte myqty boksshy. Rıngte ózin erkin sezinip, aıaqta óte jyldam qımyldap, kútpegen jerden soqqy jumsaıtyny bar eken. Onyń birneshe jekpe-jegin kórgen soń osyndaı oı túıdim. Sonymen qatar ol óte ashyq júretin boksshy ekenin de baıqadym. Onyń bul kemshiligi maǵan qol kelýi múmkin. Sondyqtan ony jeńýge bolady-aý degen birneshe jospar túzip, oǵan tosynsyı daıyndap qoıdym», deıdi Kıdd.
AQSh-qa apta buryn barǵan Danııar Eleýsinov keshe jergilikti BAQ ókilderine alǵashqy jattyǵý jıynyn ótkizdi. Sondaı-aq bul jıynǵa otandasymyzdyń promoýteri Eddı Hırn qatysyp, jýrnalısterge Danııardyń daryndy boksshy ekenin aıtyp, ony WBA (Super), IBO, WBC jáne IBF tujyrymdary boıynsha orta salmaqtaǵy álem chempıony Gennadıı Golovkınmen salystyrdy. «Sizder myna jigittiń qanshalyqty daryndy ekenin bilmeısizder. Ol kelesi Gennadıı Golovkın emes, ol – Danııar Eleýsinov. Bul jigit – Qazaqstannyń «altyn balasy». Ol erekshe daryndy, ol orta salmaqtaǵy álem chempıony bolady», dep pikir bildirdi promoýter.
Oqyrmandar arasynda Eleýsinovti Golovkınmen salystyryp, ataq jaǵynan GGG-den asyp túsedi dep senimdi túrde aıtyp jatqan bul qaı promoýter degen zańdy saýal týyndaýy múmkin. Eddı Hırn esimi kásipqoı bokstyń aınalasynda júrgenderge, boks jankúıerlerine tanys. Alaıda basqa da oqyrmandarymyz úshin bul esimniń syryn asha tússek deımiz. Eddıdiń ákesi Barrı Hırn Matchroom Sport promoýterlik kompanııasyn ashyp, biraz ýaqyt ózi basqarǵan. Keıinirek ol promoýterlik kompanııasyn ulyna beredi. Osydan soń Eddı birneshe talantty boksshylarmen kelisimshartqa otyryp, Anglııadaǵy búkil boks pen jarnama aýdıtorııasyn ózine tarta bastaıdy. Bul kezde Anglııada áıgili Rıkkı Hattonnyń promoýteri bolǵan Frenk Ýorrenniń dáýiri júrip turǵan kez bolatyn. Osydan soń Anglııada eki promoýter arasynda básekelestik bastalady.
Búginde ol – Entonı Djoshýadan bastap, Denıel Djeıkobs, Taıson Fıýrrı, Kell Brýk syndy jigitterdi jetelep júrgen promoýter. Tipti jerlesimiz Janat Jaqııanovtyń bar belbeýin tartyp alǵan Raıan Barnett te osy promoýterdiń boksshysy. Endi bul qatarǵa otandasymyz Danııar Eleýsinov te qosyldy.
Kásipqoı boksqa aýysqan ózge qazaqstandyq boksshylarǵa qaraǵanda Eleýsinov kásipqoı boks áleminde óte tanymal jáne abyroıly promoýtermen kelisimshartqa otyrdy. Sondaı-aq ol debıýttik kezdesýin AQSh-ta ótkizýge múmkindik aldy. Demek, promoýter tarapynan Eleýsinovke bar jaǵdaı jasalǵan. Endi barlyǵy tek boksshynyń ózine baılanysty. Endeshe saıysqa túsetin sańlaǵymyzǵa sáttilik tileımiz.
Álı BITО́RE, «Egemen Qazaqstan»