Mıýnhendegi «Alıans Arena» stadıonynda «Bavarııa» men «Real» kezdesip, qonaqtar jeńiske jetti. О́z alańynda jeńilip qalǵan nemisterdiń fınalǵa shyǵýy qıyndaı tústi. Al «Real» Madrıd komandasy Chempıondar lıgasynyń taǵy bir rekordyn jańartty.
«Real» komandasynan bir oıynshyny attaı qalap, jalǵa alǵan «Bavarııa» ıspandardyń óz qarýyn ózine qarsy qoldandy. Oıynnyń 28-mınýtynda Zınedın Zıdan jaratpaı tastaǵan Hames Rodrıges ortadan dopty tartyp alyp, Iosýa Kımmıhke pas asyrdy. «Bavarııa» oıynshysy joıqyn soqqymen esep ashyp, «nemis mashınasyn» alǵa shyǵardy. Osydan keıin «Realdyń» oıyny júrmeı, qonaqtar qıpalaqtap qaldy. Alaıda birinshi taım aıaqtalar tusta brazılııalyq Marselo tarazy basyn teńestirip ketti. Zıdannyń komandasy úshin bul óte mańyzdy golǵa aınaldy. Brazılııalyq qorǵaýshy esepti teńestirip qana qoımaı, ári úziliske keter aldynda qarsylasqa psıhologııalyq soqqy berdi. Osydan soń qarqynǵa qarqyn qosyp kele jatqan «Bavarııanyń» aryny basylyp qaldy. Pleı-off kezeńiniń búkil satysynda gol soqqan Marselo osyndaı mańyzdy tusta ıspan klýbyn qutqaratyn ádeti edi. Chempıondar lıgasynyń pleı-offynda 7 gol urǵan Marselo eshqandaı qorǵaýshy kórsetpegen nátıje tirkedi.
Ekinshi taımda kórinbeı júrgen Krıshtıaný Ronaldý bir-eki múmkindikke ıe boldy. «Bavarııa» qorǵaýshylary adýyndy shabýylshyny tusap ustaımyz dep júrgende alańǵa almasyp kirgen jas peri Asensıo gol soǵyp úlgerdi. Osy jarysta 4 gol salǵan Marko goldarynyń 50 paıyzyn «Bavarııaǵa» soǵypty. Chempıondar lıgasynyń búkil oıynynda gol soǵyp kele jatqan Ronaldýdyń qorjyny bul jolǵy joryqtan bos qaıtty. Degenmen 2:1 esebimen jeńiske jetken madrıdtikter taǵy bir rekord ornatty. Kári qurlyqtyń basty dodasynda «Real» 150 márte jeńis toıyn toılady.
Bir qyzyǵy, qos klýb ótken jyly Chempıondar lıgasynyń shırek fınalynda kezdesken kezde, birinshi oıyndy «Real» týra osylaı 2:1 esebimen jeńgen bolatyn. Biraq jaýapty oıynda nemister ese qaıtaryp, oıyndy qosymsha ekstra-taımǵa aýdartyp jiberdi. Berilgen 30 mınýttyń ishinde Zıdan shákirtteri 2 dop soǵyp, jartylaı fınalǵa joldama aldy. Bıylǵy tartystyń qalaı aıaqtalatynyn araǵa apta salyp tamashalaıtyn bolamyz.
Ermuhamed MÁÝLEN, «Egemen Qazaqstan»