Elbasy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda qazaqstandyq qoǵamnyń jahandaný úderisine erkin kirigýiniń basty sharttarynyń biri – latynshaǵa kóshý, onyń negizgi talaby: zamanaýı tehnologııalyq ortanyń, kommýnıkasııanyń, sondaı-aq HHI ǵasyrdaǵy bilim berýdiń artyqshylyǵyna qol jetkizý ekenin aıtqan edi.
Joǵarydaǵy Prezıdent tapsyrmasynan keıin atalmysh sala mamandary jańa álipbıdiń ártúrli jobalaryn qoǵamdyq talqyǵa usynyp, 26 qazan kúni durys dep tańdalǵan nusqany Elbasy maquldaǵan sátten bastap, qazaq tili álipbıin kırıllısadan latyn grafıkasyna kóshirýge baılanysty kóptegen uıymdastyrý jumystary qolǵa alyndy.
Atap aıtqanda, Úkimet basshysy ózi basqaratyn Ulttyq komıssııa qurylyp, nátıjesinde orfografııalyq, ádistemelik, termınologııalyq, saraptamalyq-aqparattyq jumys toptary bekitildi. Oǵan elimizdegi eń bilikti sala mamandary men ǵalymdar toptastyryldy. Qysqasy, jumys júıeli júrip jatyr. Biraq mundaı asa aýqymdy isti tolyqqandy atqarý úshin barlyq salany qamtyǵan qýatty ortalyq qajet.
Osy oraıda, Mádenıet jáne sport mınıstri Arystanbek Muhamedıuly keshe elordadaǵy Ulttyq akademııalyq kitaphanaǵa sala mamandary men zııaly qaýym ókilderin jınap, ózi basqaryp otyrǵan mınıstrlikke qarasty Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵyn qaıta qurý arqyly jańadan «Sh.Shaıahmetov atyndaǵy «Til-qazyna» ulttyq ǵylymı-praktıkalyq ortalyǵy» qurylǵanyn jarııalady.
Mınıstrdiń aıtýyna qaraǵanda, jańadan qurylyp jatqan ortalyq birinshiden, latyn grafıkasyna negizdelgen qazaq álipbıin qoǵamǵa kiriktirý kezinde vedomstvoaralyq jumystardy úılestirýi tıis. Ekinshiden, irgeli saraptamalyq zertteýler júrgizip, óz kezeginde orfografııalyq erejelerdi daıyndaý, olardy aprobasııadan ótkizý, memlekettik tildi jedel úıretý úshin ǵylymı-ádistemeler ázirleý sııaqty jumystardy atqarady. Jańa ortalyqtyń tizgin-shylbyryn qolyna alǵan akademık, fılosofııa ǵylymdarynyń doktory Ǵarıfolla Esim qyzmetke kirispeı turyp kadr máselesine baılanysty súzgi júrgizgenin, baǵymyzǵa oraı isti alyp keterlik kásibı ǵalymdar bar ekenin aıta kelip, bul is jappaı buqaralyq sıpat alýy qajet degenge toqtaldy.
Beken QAIRATULY, «Egemen Qazaqstan»