Tótenshe jaǵdaılar jónindegi departament ókilderiniń aıtýlaryna qaraǵanda sý basý yqtımaldylyǵy joǵary 60 eldi mekende 63 shaqyrym topyraq bekinisi jasalyp, 30 shaqyrymdaı sý burǵysh arnalar qazylǵan.
Oblys boıynsha 16 azamattyq qorǵanys qyzmeti, 1400 adamnan quralǵan 14 shuǵyl áreket etý otrıady, 1230 tehnıka, onyń ishinde 365 sý sorǵysh, 80-ge jýyq júzý quraly ázirlik qalpyna keltirilgen. Inertti materıaldar men janar-jaǵarmaılar tıisti aımaqtarǵa jetkizilgen. Oblys ortalyǵynan 100 myń tekshe metr qar syrtqa shyǵarylǵan. Qaýipsiz jerlerge shyǵarylǵan adamdar jatyn orynmen, ystyq taǵammen qamtamasyz etiledi.
Bıyl qar az túskendikten Esil ózeni tası qoımas dep kútilgen edi. Alaıda Astana, Qaraǵandy jaqtan jiberilgen nópir sý Sergeev sý qoımasyn lyqa toltyrǵandyqtan lajsyzdan bosatýǵa týra kelgen. Pokrovka aýyly mańyndaǵy sýdyń deńgeıi 1108 santımetrdi qurap otyr.Tasqynnyń ekpini seıilgenimen qaýiptiń beti qaıtar emes. Dolmatovo eldi mekeni aýmaǵynda sý deńgeıi 1250-1300 santımetrge deıin jetedi dep kútilýde. Novonıkolskoe aýylyna qatynaıtyn kópirdi sý alyp, qoǵamdyq kólikter aınalma jol arqyly qatynaýǵa májbúr.
Aǵyn sýdyń aldy oblys ortalyǵyna da jetip, zardabyn tıgize bastady. Qala syrtyndaǵy birqatar saıajaı ýchaskeleri sý astynda qaldy. Halyqaralyq mańyzy bar Chelıabi-Novosibir tas jolynyń bir bóligin shaıyp ketip, jeńil kólikterdiń júrýine shekteý qoıyldy. Petropavl gıdrotorabyndaǵy sý deńgeıi bir kúnde 63 santımetrge deıin kóterilgen. Aldaǵy kúnderi bul kórsetkish 1060 santımetrge deıin joǵarylaıdy degen boljam bar. Oblys ortalyǵy men Zarechnoe kenti arasyndaǵy joldy jyldaǵydaı sý alsa, zardabyn kóretin–turǵyndar. Ondaı qaýip bar.
Jergilikti sınoptıkter kóktemniń sońǵy aıy jaýyn-shashynmen bastalyp, Esildegi sý deńgeıi kóteriledi degen aqparat taratyp otyr. Tabıǵattyń mundaı qubylysy óńirdegi ahýaldy shıelenistirip jiberýi yqtımal.
О́mir Esqalı,
«Egemen Qazaqstan».
Soltústik Qazaqstan oblysy.