Almatydaǵy «Jibek joly» baspasynan jýyrda jaryq kórgen kitap «Syrymbette mektebim» dep atalady. Buǵan deıin esh jerde jarııalanbaǵan estelikter men lırıkalyq toptamalardyń avtory–belgili qoǵam qaıretkeri, aqyn, sazger Kákimbek Salyqov.
Marqum artyna elýden astam jyr jınaǵyn mura etip qaldyrǵan. Bul týyndysyna oblystyq ákimdik qarjylaı qoldaý kórsetipti. S. Muqanov atyndaǵy ǵylymı-ámbebep kitaphanada sııasy keppegen shyǵarmanyń tusaýkeser rásimi ótip, onda sóılegen sózinde oblys ákiminiń birinshi orynbasary Aıdarbek Saparov Elbasynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyna aıryqsha toqtalyp, «árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis» degen ulaǵatty paıymyn alǵa tartty. Jańa kitap asyl aǵamyzdyń týǵanyna 85 jyl tolýyna oraı jurtshylyqtyń qolyna tıdi. «Jaqsynyń aty, ǵalymnyń haty ólmeıdi» degen osy deı kelip, «Myqty dep esepteme» óleńin naqyshyna keltirip oqyp berdi.
Tusaýkeser rásimge Almaty men Astanadan kelgen mártebeli meımandardyń biri marqumnyń uly Erlan demeýshilik kórsetkeni úshin aımaq basshysy Qumar Aqsaqalovqa áýlettiń alǵysyn aıtty. Ákemniń sanaly ǵumyrynyń bir bóligi atamekennen jyraqta ótse de týǵan jerin esh umytqan emes. Altyn besik aýylyn, bal dáýren balalyq shaǵyn, ushqan uıasyn, ulaǵatty ustazdaryn kóptegen jyrlaryna arqaý etti, dedi ol.
K. Salyqov atyndaǵy «Jezkıik» qorynyń jetekshisi Mereke Qasenova eki bólimnen turatyn kitap «Syrymbette mektebim» maqalasymen ashylatynyn, bul maqalany zaıyby Márııam apaı boıtumardaı saqtap kelgenin, aqyn úlken ómirge túkpirdegi aýyldan qanattanyp ushqanyn árkez maqtan etip otyratynyn jetkizdi. «Syrymbet maǵan bul kúnde Pýshkınniń Mıhaılovskoesi, Abaıdyń Qaraýyl tóbesi sııaqty kıeli ordam, qutty shaharym, arýaqty altyn besigim bolyp kórinedi» dep tolqı, shalqı tógilgen eken qarymdy qalamger. Bul bilim ordasynda Shot-Aman Ýálıhanov, Qojahmet Balahmetov sekildi bilikti el azamattary tálim-tárbıe alǵanyn aıta ketken jón.
Jıynda oblystyń qurmetti azamattary Jaqsylyq Ysqaqov, Qudaıbergen Qalıev, almatylyq ǵalym-akademık Amandyq Tóleshov, «Syrymbettegi» keshendi murajaıdyń dırektory Ýálıhan Qulbaev, aqyn oqyǵan mekteptiń túlegi, SQMÝ-niń professory Janbaı Qadyrov, taǵy basqalary este qalar esteliktermen bólisip, aqyn rýhyna taǵzym etti.
Jergilikti ónerpazdar K.Salyqovtyń ánderin áýelete shyrqady.
«О́lmeıtuǵyn artyna sóz qaldyrǵan»/Abaı/tulǵanyń ómiri men shyǵarmalary jas býyn úshin de úlken tálim-tárbıe mektebi bolyp qala bereri anyq.
О́mir Esqalı,
«Egemen Qazaqstan»
Soltústik Qazaqstan oblysy