Rıo Olımpıadasynyń chempıony Danııar Eleýsinov kásipqoı bokstaǵy tuńǵysh jekpe-jegin sátti bastady. AQSh-tyń Nıý-Iork qalasynda ornalasqan «Barklaıs» arenasynda ótken kezdesýde otandasymyz amerıkalyq boksshy Noa Kıddti úshinshi raýndta tehnıkalyq nokaýtpen jeńdi.
Jartylaı orta salmaqta judyryqtasqan Danııar Eleýsinovtiń jekpe-jegi Gennadıı Golovkınniń eks-qarsylasy Denıel Djeıkobstyń qatysýymen bolǵan boks keshinde ótti. Aldyn ala málimet boıynsha Eleýsinov-Kıdd aıqasy 6 raýndqa josparlanǵan-dy.
Jekpe-jektiń birinshi raýndynda eki boksshy bir-birin barlaýmen ótkizdi. Dese de Eleýsinov reti kelgende qarsylasyn soqqynyń astyna alyp, biraz tyqsyryp baqty. Ekinshi raýndta qandasymyz basymdyqty óz qolyna aldy. Qarsylasyna múldem soqqy jasaýǵa múmkindik bermeı, rıng ústinde óz bıligin júrgizdi. Al úshinshi raýndqa kelgende Eleýsinov aıqasty uzaqqa sozbaı, osy ranýdta-aq aıaqtap tastaýǵa bel býdy. Amerıkalyq boksshy soqqy jasamaqshy bolyp, qolyn alǵa sozǵanda qorǵanysy ashyq qalǵanyn baıqaǵan Danııar, sol qolynyń aýyr soqqysymen qarsylasyn eseńgiretip tastady. 10 sekýndtan soń Kıdd kezdesýdi jalǵastyra alatynyn aıtyp, ornynan turǵanymen, qandasymyz ony qaıta soqqynyń astyna aldy. Alaıda amerıkalyq boksshynyń judyryqtasýǵa qaýqary qalmaǵanyn baıqap, tóreshi jekpe-jekti toqtatýǵa májbúr boldy. Osylaısha Danııar Eleýsinov kásipqoı bokstaǵy mansabyn jarqyn jeńispen bastady.
Kezdesýden soń Noa Kıdd jergilikti BAQ ókilderine jeńilisiniń sebebin aıtyp berdi. «Bilesizder me, meniń qarsylasym eki Olımpııa oıyndaryna qatysyp, bir ret chempıon bolǵan. Ol óte myqty jáne tájirıbeli boksshy. Jalpy jekpe-jekke daıyndyǵym óte az boldy. Taǵy úsh aptaǵa jýyq daıyndalǵanymda búgin basqa aıqasty kóretin edińizder. Meniń jattyǵýymnyń kóp bóligi salmaq qýýmen ótti. Sondyqtan kúshimniń birazyn sarqyp aldym desem de bolady. Bul – aqtalǵanym emes. Jeńilisimdi moıyndaımyn. Kareramda birinshi ret úshinshi raýndta jeńilip qaldym. Endi jattyǵý zalyna tezirek oralyp, daıyndyǵymdy eki ese arttyratyn bolamyn», dedi amerıkalyq boksshy.
Ol búginge deıin tórt kezdesý ótkizip, úsheýinde jeńiske jetse, bireýinde teń túsken. 23 jastaǵy Kıdd kásipqoı bokstyń álippesin osydan eki jyl buryn bastaǵan. Sońǵy aıqasyn ótken jyldyń jeltoqsan aıynda ótkizip, qarsylasyn tehnıkalyq nokaýtpen jeńgen.
Sonymen qatar RingTV basylymynyń jýrnalısi Raıan Songalııa Danııar Eleýsinov jekpe-jegin osylaı jalǵastyra berse, az ýaqyttyń ishinde TOP boksshylardyń qataryna enetinin aıtty. «Ol kásipqoı bokstaǵy qadamyn sátti bastady. Men osy kúnnen bastap onyń ár qadamyn baqylap otyramyn. Ol tez arada úzdik boksshylardyń qataryna enetinine senimdimin. Onyń jyldamdyǵy men rıngte erkin qımyldaýy meni qatty rıza etti», dedi ol.
Álı BITО́RE,
«Egemen Qazaqstan»