Qazirgi tańda elimizdiń keıbir óńirlerinde velosıped tebý ómir saltyna aınalyp barady. Velosıped tebý naýqany resmı túrde ashylatyn kezge de jettik. Bul rette Býrabaı kýrortty aımaǵynda velosıped tebý kezeńi resmı túrde ashylýy sonyń dáleli. Aqmola oblystyq týrızm basqarmasy, Býrabaı aýdany ákimdigi jáne «Býrabaı Damý» JShS birlesip uıymdastyrǵan «Veloburabay-2018» kezeńiniń bastalýy Astananyń 20 jyldyq mereıtoıyna arnaldy.
Aqmola oblysy Týrıstik aqparat ortalyǵynyń keń aýqymdy jarnamalaý jumystaryn júrgizýi nátıjesinde Kókshetaý qalasynan 150 adam velotebý naýqanynyń ashylýyna qatysty. Veloshabandozdardy jarys alańyna deıin tegin jetkizý úshin tipti kólik te uıymdastyryldy. Nátıjesinde velojarysqa 420 adam qatyssa, olardyń sapynda «Velotop Astana», «Kókshe» veloqaýymdastyǵynyń kásibı veloshabandozdary da boldy. Sonymen qatar qatarǵa Aqmola oblysynyń ártúrli óńirlerinen, Astana, Kókshetaý, Stepnogor jáne Shýche qalalarynan velosıped tebýdi daǵdyǵa aınaldyrǵan áýesqoılar da kelip qosyldy.
Reti kelgende aıta ketý kerek, «Burabay Land» taqyryptyq saıabaǵynda Aqmola oblysynyń ákimi Málik Myrzalın qatysýshylarǵa arnap quttyqtaýyn jetkizgennen keıin ózi de velosıpedke qonyp, kolonnany bastap júrdi. Velosıpedpen júrip ótý araqashyqtyǵy 28 shaqyrym eńserilgennen keıin eń jas, eń egde jasqa jetken jáne eń úzdik nátıje kórsetken názik jandy sportshyǵa syıaqy berildi.
Asqar TURAPBAIULY, «Egemen Qazaqstan»
Aqmola oblysy