Úkimet úıinde Premer-Mınıstr Baqytjan Saǵyntaev Qazaqstandaǵy Eýropalyq odaq ókildiginiń basshysy Traıan Hrısteamen kezdesý ótkizdi, dep habarlady Premer-Mınıstrdiń baspasóz qyzmeti.
Kezdesý barysynda Qazaqstan Respýblıkasy men Eýropalyq odaq arasyndaǵy keńeıtilgen áriptestik jáne yntymaqtastyq týraly kelisimdi iske asyrý, saýda-ekonomıkalyq ózara is-qımyldy keńeıtý jáne sheteldik ınvestısııalardy tartý máseleleri talqylandy.
Aıta ketý kerek, Qazaqstannyń Eýropalyq odaqpen saýda-ekonomıkalyq baılanystary joǵary deńgeıde saqtalyp otyr. Eýroodaq elimizdiń negizgi saýda jáne ınvestısııalyq seriktesi. Onyń úlesine Qazaqstannyń syrtqy saýda aınalymynyń 50%-y jáne el ekonomıkasyna tartylǵan sheteldik kapıtaldyń jartysynan astamy tıesili.
Qazaqstan men EO elderi arasyndaǵy taýar aınalymy 2018 jyldyń qańtar-aqpan aılarynda 5,5 mlrd dollardy qurady, bul ótken jyldyń osyndaı merzimimen salystyrǵanda 32,6%-ǵa joǵary kórsetkish.