Memleket basshysynyń naryq pen bazardaǵy tártipti qamtamasyz etý jónindegi tapsyrmasyna sáıkes Aqtóbe oblysynyń ákimi Berdibek Saparbaev Aqtóbe qalasyndaǵy ortalyq bazardyń qyzmetimen tanysty.
TJD basshysy Baýyrjan Syzdyqovtyń málimdeýinshe ortalyq bazardy tekserý kezinde órt qaýipsizdigi boıynsha 32 talaptyń buzylǵandyǵy anyqtaldy. Evakýasııalyq shyǵý joldarynyń ybyrsyp turǵandyǵy, arnaıy órt tehnıkasynyń bazardaǵy ǵımarattar men qurylystarǵa ótýi qamtamasyz etilmegendigi, órt dabylynyń aqaýy bary jáne t.b. belgili boldy.
- Maýsym aıynyń sońynda merzimi bitetin barlyq buzýshylyqtardy joıý týraly buıryq berildi. Budan ózge, aýdanaralyq ekonomıkalyq sotqa buzýshylyqty tolyqtaı joıǵanǵa deıin qyzmetin toqtatýǵa qýynym jiberildi.
Oblys ákimi bazar qyzmetin retteý jáne baǵa belgileý máselelerin, sonyń ishinde sanıtarlyq jáne órt qaýipsizdigin qamtamasyz etý jaǵyn qatań baqylaýda ustaýdy tapsyrdy.
Eger jumys jasaǵysy kelse adamdardyń qaýipsizdigin qamtamasyz etsin jáne buzýshylyqtardy joısyn. Joımasa - jaýyp tastasyn, - dedi Berdibek Saparbaev.
Sonymen qatar, oblys basshysy 2018-2019 jyldary paıdalanýǵa beriletin «Aqtóbe» ındýstrıaldy aımaǵyndaǵy 11 jańa ınvestısııalyq jobalardy iske asyrý barysymen tanysty. Birneshe jobalar boıynsha áli qurylys-montaj jumystary bastalmasa da «Aqtóbe» ÁKK jer bólý basqa da sharalardy qamtamasyz etý úshin óz mindettemelerin oryndaǵan.
- 1 qyrkúıek – sońǵy merzim. Osy ýaqytqa qurylysyn iske qospaǵandardyń jeri tartyp alynady, - dep oblys basshysy ınvestorlarǵa eskertti.
Sonymen qatar, Berdibek Saparbaev Aqtóbedegi birqatar mańyzdy áleýmettik jáne óndiristik nysandardyń, jyl boıǵy «Ásem» lageri, akvapark, Neke saraıy, «Analarǵa taǵzym» murajaı-úıi, tarıhı-ólketaný mýzeıi, muz aıdyny saraıy, «AZF» aýdanyndaǵy qaladan shyǵatyn ótpe jolyn jáne «Kóktas-Aqtóbe» AQ sılıkat ónimderiniń zaýytynyń qurylys barysymen tanysty.
Temir Qusaıyn,
«Egemen Qazaqstan»
Aqtóbe