Prezıdent janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń hatshysy, Prezıdent Əkimshiligi ishki saıasat bóliminiń meńgerýshisi Aıda Balaeva arnaıy saparmen Qaraǵandyǵa kelip, E.Bóketov atyndaǵy QarMÝ-da «Rýhanı jańǵyrý» baǵdarlamasyn júzege asyrý barysyn talqylaǵan jıyn ótkizdi.
Alqaly basqosýǵa «Nur Otan» partııasynyń hatshysy F.Qýanǵanov, Bilim jáne ǵylym mınıstrliginiń jaýapty hatshysy A.О́rsarıev, Qaraǵandy oblysy ákiminiń orynbasary J.Ábishev, Qaraǵandy oblystyq qoǵamdyq keńesiniń tóraǵasy E.Aımaǵambetov, «Rýhanı jańǵyrý» baǵdarlamasy boıynsha aımaqtyq saraptamalyq keńes músheleri men QarMÝ-dyń professor-oqytýshylar quramy, magıstranttary men stýdentteri qatysty.
Laýazymdy qonaqtar oqý ornyndaǵy «Tulǵataný» ortalyǵynyń jumysymen tanysty. Aıda Balaeva bolashaq mamandardy oqytý men tárbıeleýde aýqymdy jumystar atqaryp kele jetqan QarMÝ ujymyna rızashylyǵyn bildirdi.
– Jańa tarıhı kezeńge aıaq basqanda qabyldanǵan «Rýhanı jańǵyrý» baǵdarlamasy – memleket kelesheginiń aıqyn josparlanǵan baǵyty. Qoǵamdyq sanany jańǵyrtyp, jarqyn bolashaqqa jetý múmkindigine biz úlken jaýapkershilikti seziný arqyly ǵana ıe bolamyz, – dedi Aıda Ǵalymqyzy óz sózinde.
«Rýhanı jańǵyrý» baǵdarlamasy sanany jańǵyrtyp, básekege qabilettilikti damytýmen qatar, ozyq otyz eldiń qataryna qosylý maqsatyndaǵy sharalardy júzege asyrýdy kózdeıdi. Baǵdarlamanyń mańyzdylyǵy men qajettiligin halyqqa jetkize bilý kerek.
Kezdesý barysynda, sonymen qatar, latyn grafıkasyna kóshýge, «100 jańa kitap», «100 jańa esim», «Qazaqstannyń kıeli jerleriniń geografııasy», «Jahandaǵy zamanaýı qazaqstandyq mádenıet» jobalaryna qatysty máseleler talqylandy.
Kezdesýdi qorytyndylaı kele, A.Balaeva «Rýhanı jańǵyrý» baǵdarlamasy aıasyndaǵy jobalar boıynsha ýnıversıtet ujymyna naqty tapsyrmalar berdi. Sonymen qatar, osy jyldyń tamyz aıyna deıin baǵdarlamanyń barlyq baǵyttary boıynsha naqty jobalar usynyp, olardy júzege asyrý joldaryn kórsetýge usynys jasady.
Qaırat ÁBILDA,
«Egemen Qazaqstan»
QARAǴANDY