Qazaqstan Prezıdenti Ujymdyq qaýipsizdik shart uıymyna múshe memleketterdiń qaýipsizdik keńesteriniń hatshylarymen jáne qorǵanys vedomstvolarynyń mınıstrlerimen kezdesti.
Memleket basshysy Qazaqstannyń Ujymdyq qaýipsizdik shart uıymyna tóraǵalyq etý kezeńinde ótip jatqan Qorǵanys mınıstrleriniń keńesi men Qaýipsizdik keńesiniń hatshylary komıtetiniń sessııaaralyq otyrystaryna qatysýshylarǵa iltıpat bildirdi.
– Sizder ókildik etip otyrǵan Ujymdyq qaýipsizdik shart uıymynyń Jarǵylyq organdary keń aýqymdy máselelerdi qarastyrady. Atap aıtqanda, áskerı saladaǵy kóp jaqty yntymaqtastyqty damytý, halyqaralyq terrorızmge, zańsyz esirtki aınalymyna jáne zańsyz mıgrasııaǵa qarsy kúres júrgizý, sondaı-aq úılesimdi aqparattyq saıasatqa qatysty ustanymdardy ázirleý máselelerin qarastyrý kózdelip otyr, – dedi Nursultan Nazarbaev.
Memleket basshysy álemde jáne óńirde kúrdeli áskerı-saıası ahýaldyń saqtalyp otyrǵanyn aıtty, sondaı-aq halyqaralyq terrorıstik uıymdardyń belsendi áreket etip, aqparattyq keńistikke tónetin qaýip-qaterdiń artyp kele jatqanyna toqtaldy.
Qazaqstan Prezıdenti birlesken oqý-jattyǵýlar men operasııalardy júrgizý barysynda memleketaralyq baılanystardy úılestirý, ujymdyq tetikterdi jetildirý, sondaı-aq ózara is-qımyldy pysyqtaý úshin qorǵanys vedomstvolary men qaýipsizdik keńesteri apparattarynyń róli zor ekenin atap ótti.
– Birlesken qyzmet kelisilgen baǵytta jáne Ujymdyq qaýipsizdik shart uıymynyń 2025 jylǵa deıingi damý strategııasynda naqtylanǵan jarǵylyq mindetterge sáıkes júrgizilýge tıis. Bizdiń Jedel áreket etýshi ujymdyq kúshterimiz árdaıym ózderine júktelgen mindetterdi oryndaýǵa daıyn, – dedi Nursultan Nazarbaev.
Qazaqstan Prezıdenti Almaty oblysynda ótken «Kobalt-2018» oqý-jattyǵý sharalarynyń nátıjelerine toqtaldy.
Qazaqstan Prezıdenti Jedel áreket etýshi ujymdyq kúshterdi materıaldyq-tehnıkalyq turǵydan qamtamasyz etýdiń naqty baǵdarlamalary men josparlaryn ázirleý qajettigine nazar aýdardy.
Nursultan Nazarbaev áskerı-tehnıkalyq yntymaqtastyq salasyndaǵy praktıkalyq sharalarǵa erekshe kóńil bólýge shaqyrdy. Ol úshin «KADEX-2018» kórmesiniń múmkindikterin paıdalaný qajettigin aıtty.
– Qazir Ujymdyq qaýipsizdik shart uıymynyń birikken shtabynyń sany edáýir ósti. Sondyqtan onyń jumysy sapalyq turǵydan jaqsarady dep úmittenýge quqymyz bar. Qazaqstan halyqaralyq terrorızmdi jalpy álemdegi jáne Ujymdyq qaýipsizdik shart uıymynyń jaýapkershiligi aıasyndaǵy eń ótkir problema dep sanaıdy, – dedi Memleket basshysy.
Qazaqstan Prezıdenti halyqaralyq terrorızmge qarsy turý isinde ujymdyq kúsh-jigerdiń tıimdi bolatynyn atap ótti.
Sonymen qatar Nursultan Nazarbaev Ujymdyq qaýipsizdik shart uıymynyń halyqaralyq qoǵamdastyqpen baılanysyn keńeıtý, shynaıy qaterlerge qarsy tıimdi sharalar uıymdastyrý, aqparattyq jáne kıberqaýipsizdikti qamtamasyz etý máselelerine toqtaldy.
Sońynda Memleket basshysy Qorǵanys mınıstrleri keńesi men Qaýipsizdik keńesteri hatshylarynyń komıteti Ujymdyq qaýipsizdik shart uıymynyń ortaq mindetterin sheshýge zor úles qosatynyna senim bildirdi.