Jambyl oblysyna Qyrǵyz Respýblıkasy Úkimetiniń Talas oblysyndaǵy ókiletti ókili Marat Muratalıev bastaǵan delegasııa jumys saparymen keldi. Qyrǵyz aǵaıyndardy «Aısha bıbi» shekara beketinen oblys ákimi Asqar Myrzahmetov bastaǵan jambyldyqtar halqymyzǵa tán qurmetpen kútip aldy.
Kezdesýdiń maqsaty – shekaralas elder men kórshiles óńirler arasyndaǵy yntymaqtastyqty jáne seriktestikti nyǵaıtý boıynsha naqty is-sharalardy josparlaý.
Budan keıin qyrǵyz aǵaıyndar Taraz qalasyndaǵy «Dostyq» úıine kelip, Jambyl oblysy taýar óndirýshileriniń ónerkásip jáne aýylsharýashylyq ónimderiniń kórmesin tamashalady. Sonymen qatar aıaq-kıim, toqyma jáne jeńil ónerkásip buıymdarynyń jasalý joldarymen tanysty. Al mundaǵy qurylys zattary, energoúnemdi shamdardyń aýqymdy assortımenti, bylǵary, sút jáne shujyq ónimderi kelýshilerdiń nazaryn ózine aýdardy.
Jalpy, Jambyl jáne Talas oblystaryna kóptegen ıgiliktiń, sonymen qatar keıbir máseleniń de ortaq ekeni jasyryn emes. Jáne de eki el arasyndaǵy dostyq qarym-qatynas kún sanap artyp keledi. Bul jaıynda qos oblys basshylary bas qosqan jıynda aıtyldy. Jambyl oblystyq týrızm basqarmasynyń basshysy Qarlyǵash Aralbekova óńirdegi týrızm salasynyń damýy men kóne Áýlıeatanyń kıeli oryndary jóninde sóz qozǵap, Jambyl jáne Talas oblystarynyń búgingi qarym-qatynasy jańa jetistikterge jol ashatynyn atap ótti.
О́z sózinde Talas memlekettik ýnıversıtetiniń rektory Aıbek Úpenov atalǵan joǵary oqý ornynda 15 mamandyq boıynsha bilim alyp júrgen 3 myń stýdenttiń júzden astamy jambyldyq jastar ekenine toqtaldy.
Negizinen Jambyl oblysynyń aýyl sharýashylyǵyna qajetti sýdyń 80 paıyzǵa jýyǵy qyrǵyz elinen keledi. Atalǵan jıynda Talas ózeni týraly memleketaralyq sý bólisý boıynsha bekitilgen kestege sáıkes, Qazaqstan Respýblıkasy men Qyrǵyz Respýblıkasynyń arasyndaǵy sý resýrstaryn ádil bólý, Qazaqstandaǵy aýylsharýashylyq ónerkásipteri úshin Koj jáne Raıs kanaldary boıynsha sýarý ýaqytynda úzilissiz sý berýmen qamtamasyz etý sııaqty máseleler talqylandy. Bul rette Talas oblystyq memlekettik sý sharýashylyǵy mekemesiniń basshysy Bolat Batyrqulov Jambyl jerine qajetti sýdyń óz mólsherinde bólinip jatqanyn aıtty.
Kezdesý barysynda Jambyl oblysynyń ákimi Asqar Myrzahmetov pen Qyrǵyz Respýblıkasy Úkimetiniń Talas oblysyndaǵy ókiletti ókili Marat Muratalıev ózara yntymaqtastyq týraly memorandýmǵa qol qoıdy. Munda aýyl sharýashylyǵy men sý bólisý týraly memleketaralyq máseleler júıelengen. Sondaı-aq qujatta Jambyl oblysynan sıyr etin ımporttaýǵa kvota bólý, Jambyl oblysyna Talas oblysynan jemis-kókónisterdiń erte pisetin ónimderin jylyjaıǵa jetkizýge kómektesý, Talas oblysyna bıdaı, un jáne et ónimderin tasymaldaý boıynsha is-sharalardy uıymdastyrý, Jambyl óńirine erte kóktemdik sharýashylyq ónimderiniń túrlerin jetkizý baǵytyndaǵy jumystar da qamtylǵan. Sonymen qatar bolashaqta qos oblys arasyndaǵy týrızmdi damytý máselesinde eki óńirdiń týrızm basqarmalarynyń basshylary arasynda da kelisimder jasaldy.
Sapardyń iskerlik bóligi aıaqtalǵan soń «Balasaǵun» ortalyq konsert zalynda «Birligimiz jarasqan!» atty Jambyl oblysy men Talas oblysy kórkemónerpazdarynyń qatysýymen festıval ótti. Munda qazaq pen qyrǵyzdyń áıgili óner qaıratkerleriniń shyǵarmalary oryndalyp, kópshiliktiń kóńilinen shyqty. Al budan keıin qyrǵyz aǵaıyndar Áýlıeata óńiriniń tarıhı-mádenı eskertkishterimen tanysty.
Hamıt ESAMAN, «Egemen Qazaqstan»
Jambyl oblysy