Kezdesý barysynda Gúlshara Ábdiqalyqova bıyl Qazaqstan men Sıngapýr arasyndaǵy dıplomatııalyq qarym-qatynasqa 25 jyl tolǵanyna toqtalyp, Elbasynyń tapsyrmasymen elimizdi damyǵan 30 memlekettiń qataryna qosýǵa baǵyttalǵan «Qazaqstan – 2050» strategııasynyń júzege asyrylyp jatqany, ekonomıkany, saıasatty jáne qoǵamdyq sanany qamtıtyn júıeli jańǵyrý júrgizilip otyrǵany, sondaı-aq memlekettik qyzmet pen sybaılas jemqorlyqqa qarsy is-qımyl salalarynda aýqymdy ózgerister qolǵa alynǵany jóninde aıtty.
Memlekettik hatshy Sıngapýrdyń áleýmettik-ekonomıkalyq damý isindegi tájirıbesiniń Qazaqstan úshin máni zor ekenin, ásirese memlekettik qyzmetti reformalaýǵa, adamı resýrstardyń sapasyn arttyrýǵa jáne ulttyq ekonomıkany sıfrlandyrýǵa qatysty máselelerdi atap ótti.
– Astanadaǵy Sizdiń semınarlaryńyz bizge «merıtokratııanyń» sıngapýrlyq modeliniń negizderin tereńirek túsinýge múmkindik beredi jáne Qazaqstannyń memlekettik qyzmetshileriniń biliktiligin arttyrýǵa septigin tıgizedi dep senemin, – dedi Gúlshara Ábdiqalyqova.
Memlekettik hatshy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty bıylǵy Joldaýda adamı kapıtaldyń damýy basymdyqqa ıe mindetterdiń biri bolǵanyn atap ótip, Qazaqstanda halyqaralyq deńgeıdegi óz ýnıversıtetterimiz – tájirıbesi elimizdiń barlyq joǵary oqý oryndarynda qoldanylatyn Nazarbaev Ýnıversıteti, Qazaqstan-Brıtan tehnıkalyq ýnıversıteti, Qazaqstan menedjment, ekonomıka jáne josparlaý ınstıtýty jáne basqa da bilim ordalarynyń ashylǵanyn aıtty.
– Lı Kýan Iý memlekettik saıasat mektebi Qazaqstandaǵy Sıngapýrdyń ózindik «Education Ambassador» sekildi bolady jáne Qazaqstan men Sıngapýrdyń bilim berý mekemeleri arasyndaǵy seriktestik baılanystardy keńeıtýge yqpal etedi dep úmittenemiz, – dedi Memlekettik hatshy.
Kezdesý sońynda Gúlshara Ábdiqalyqova professor Lım Sıong Gýanǵa zor tabys tilep, syndarly yntymaqtastyqtyń odan ári jalǵasa beretinine nıettestik bildirdi.