«Nur Otan» partııasynyń qoldaýymen shalǵaıdaǵy Ýálıhanov aýdanynda kovorkıng ortalyǵy ashyldy.
Aýdandyq ortalyqtandyrylǵan kitaphanada paıdalanýǵa berilgen kovorkıng ortalyǵy qajetti orgtehnıkalarmen tolyq jabdyqtalǵan. Munda jastar men balalardyń bos ýaqyttaryn mazmundy ótkizýge jan-jaqty múmkindikter týdyrylǵan. Qyzyqty is-sharalar sport, mádenı, taǵy basqa salalarda uıymdastyrylyp, qyzmetter tegin kórsetiletin bolady. «Bolashaqqa baǵdar: rýhanı jańǵyrý» baǵdarlamasy sheńberinde de aýqymdy jumystar atqarý belgilengen.
Onyń ashylý saltanatyna «Nur Otan» partııasy aýdandyq fılıalynyń tóraǵasy, aýdan ákimi Medet Ospanov, oblystyq saıası uıymnyń partııalyq baqylaý ınspektory Aleksandr Bodýnovskıı, aýdandyq kásipkerler palatasynyń dırektory Batyrhan Ahmetov qatysty. Olardyń aıtýlarynsha jastardyń shyǵarmashylyq jáne ǵylymı áleýetin iske asyrýǵa barlyq alǵy sharttar jasalǵan.
«Nur Otan partııasyTóraǵasynyń partııalyq jańǵyrtý tapsyrmalary aıasynda paıdalanýǵa berilgen zamanaýı ortalyqta jastarózderiniń shyǵarmashylyq oılaryn júzege asyrýmen qatar túrli formatta kezdesýler, semınarlar, konferensııalar ótkize alady. Ozyq ıdeıalar ortaǵa salynyp, qoǵamnyń mańyzdy máseleleri keńinen talqylanady. Jas urpaqty qoldaýǵa arnalǵan jobanyń ómirsheńdigi zor. Mektep oqýshylary da osynda óz bilimderin jetildirip, teledıdar arqyly mýltfılmder kórýlerine, ǵalamtordan izdegenderin tabýyna bolady, dedi óz sózinde aýdan ákimi M. Ospanov.
Búginde óńirde 10 kovorkıng ortalyǵy jumys isteıdi. Aldaǵy ýaqytta ár aýdan ortalyǵynda qurylatyn bolady.
О́mir ESQALI,
«Egemen Qazaqstan»
Soltústik Qazaqstan oblysy