Menıngıtke qarsy ekpe tegin medısınalyq kómektiń kepildik berilgen kólemine enbegen jáne memleket onyń baǵasyn rettemeıdi. Bul týraly Ulttyq dárilik zattardy saraptaý ortalyǵy dırektorynyń birinshi orynbasary Arnur Nurtaev málim etti.
«Qazirgi ýaqytta bul vaksına tegin medısınalyq kómektiń kepildik berilgen kólemine enbegen jáne memleket onyń baǵasyn rettemeıdi. Kásipkerler ózderi uıǵarǵan baǵany bekitedi. Bizdiń 6 700 vaksına jetkizildi jáne olar bólshek saýda naryǵynda medısınalyq ortalyqtar men vaksınalaý kabınetteri arqyly taralýda. Qazir memleket tarapynan tegin vaksınasııa júrgizýge qatysty másele talqylanýda. Ol Qoǵamdyq densaýlyq saqtaý komıtetiniń quzyrynda», - dedi Arnur Nurtaev Ortalyq kommýnıkasııalar qyzmetinde ótken baspasóz máslıhatynda.
Sonymen birge, QR Densaýlyq saqtaý mınıstrligi Farmasııa komıtetiniń tóraǵasy Lıýdmıla Bıýrabekova Astanadaǵy juqpaly aýrýlar aýrýhanasynyń qajetti preparattarmen tolyq qamtylǵanyn habarlady. «Aýrý belgileri paıda bolyp, dıagnoz qoıylǵan jaǵdaıda naýqastar juqpaly aýrýlar aýrýhanasyna jetkiziledi. Juqpaly aýrýlar aýrýhanasyna qajetti dáriler biryńǵaı dıstrıbıýtor tiziminde bar jáne satyp alynǵan. Jeksenbi kúni ózim Astanadaǵy Balalarǵa arnalǵan juqpaly aýrýlar aýrýhanasyna baryp, preparattardy tekserdim. Barlyq antıbıotıkter bar. Pasıentke qajetti barlyq terapııa tegin medısınalyq kómektiń kepildik berilgen kólemi aıasynda memlekettik bıýdjet esebinen qamtamasyz etilgen», - dedi Lıýdmıla Bıýrabekova.