Oral qalasynda «Asyl Mıras» balalar aýtızm ortalyǵy ashyldy. Ortalyqty belgili mesenat Bolat О́temuratovtyń qory «Báıterek» múgedek balalar qorymen birge Batys Qazaqstan oblysy ákimdiginiń qoldaýymen ashyp otyr. Bul elimiz boıynsha aýtızm dertine shaldyqqan balalarǵa arnalǵan altynshy ortalyq.
– О́tken jyly Oralda «Samruk-Kazyna Trust» kompanııasy men «Dara» qorynyń áleýmettik baǵdarlamasy sheńberinde tuńǵysh ret korreksııalyq ortalyq ashylǵan bolatyn. Zachagansk kentinde erekshe balalarǵa arnalǵan ortalyq jergilikti mesenattar kúshimen salynyp jatyr. Búgin ashylyp otyrǵan «Asyl Mıras» ortalyǵynda da myqty mamandar erekshe balalarmen jumys isteıtin bolady. Munyń bári taǵdyr taýqymetine ushyraǵan sábılerimizge úlken kómek, - dedi ózi sózinde Batys Qazaqstan oblysy ákiminiń orynbasary Ǵabıdolla Ospanqulov.
Bolata О́temuratov qorynyń dırektory Marat Aıtmaǵambetovtiń aıtýynsha, «Asyl Mıras» aýtızm ortalyqtary Qazaqstanda 2015 jyldan bastap ashyla bastaǵan. Sodan beri elimiz boıynsha 3622 bala qorǵa habarlasyp, kómek surapty.
– Osylardyń ishinen 2608 bala mamandandyrylǵan dıagnostıkalyq tekserýden ótti. Baǵdarlama boıynsha 2 151 balaǵa tegin kómek kórsetildi. Ortalyqqa ǵylymmen dáleldengen, eń tıimdi ádistemeler qoldanylady. Oral qalasynda da biz muqtaj jandarǵa barynsha kómek kórsetemiz dep oılaımyn. Mundaı balalar men olardyń ata-anasy qoǵamnyń kómegin sezinýi óte mańyzdy, - deıdi M.Aıtmaǵambetov.
Jańa ortalyqta balalardyń sal aýrýyna ushyraǵandar úshin zamanaýı jabdyqtar, «Akrobat» transformeri, basqa da quraldar – barlyǵy 7 980 myń teńgeniń múlki ornalastyrylǵan eken.
«Báıterek» qoǵamdyq birlestiginiń jetekshisi Merýert Sankaeva ortalyqty baǵdarlamalyq qamtý mindetin de B.О́temuratov qory óz moınyna alǵanyn aıtady. Oraldyq «Asyl Mıras» ortalyǵynda arnaıy daıyndyqtan ótken 8 maman qyzmet etpek. Munda kelýshilerge erte kómek, sóıleý daǵdysyn damytý, ortaǵa beıimdeý, áleýmettik jáne turmystyq túısikti qalyptastyrý sekildi mamandandyrylǵan sabaqtar júrgiziledi.
Batys Qazaqstan oblysynda aýtızm dıagnozy qoıylǵan 140 bala bar, onyń 47-si Oral qalasynda turady. Olardyń jas mólsheri 7 men 15 jas aralyǵynda.
Qazbek QUTTYMURATULY,
«Egemen Qazaqstan»
Oral qalasy
Sýretti túsirgen Dınara KENDIRBAEVA