Memleketimizdiń basty nyshandary Tý, Eltańba, Ánuranǵa bıyl 26 jyl toldy. Búgin Astana qalasynyń ákimdigi Qazaqstan Respýblıkasynyń memlekettik rámizderi kúnine oraı saltanatty is-shara ótkizdi, dep habarlaıdy Astana qalasy ákimdiginiń resmı saıty.
Ánurandy oqýshylar, stýdentter, memlekettik qyzmetshiler birlesip oryndady. Atalmysh patrıottyq is-sharany Astana qalasynyń Tilderdi damytý jáne arhıv isi basqarmasy uıymdastyrdy. Sharaǵa qalalyq basqarma jáne aýdan ákimdikteriniń ókilderi qatysty.
«Memlekettik rámizder – elimizdiń egemendigi men táýelsizdigin pash etýshi ári tarıhymyzdyń ótkeni, búgini jáne bolashaǵy arasyndaǵy sabaqtastyqtyń jarqyn beınesi. Elimizdiń bas nyshany bolyp tabylatyn rámizderge qurmet kórsetý jáne olar týraly zańnamalyq erejelerdiń durys oryndalýyn qamtamasyz etý kez kelgen azamattyń paryzy, al memlekettik mekemeler úshin negizgi mindet», – dedi Tilderdi damytý jáne arhıv isi basqarmasy basshysynyń orynbasary Qaırat Qambarov.
Is-sharanyń basty qonaǵy bolyp Qazaqstan Respýblıkasynyń Memlekettik Eltańbanyń avtory Jandarbek Málibekov qatysty.
«Bul erekshe kún. 1992 jyly biz Qazaqstan Respýblıkasynyń rámizderin qabyldadyq. Sol kúnnen bastap, mine 26 jyl ótti. Sodan beri bizdiń memlekettik rámizderimiz álem boıynsha tanylyp, qurmettele bastady», – dedi Jandarbek Málibekov.
Eske sala keteıik, 1992 jyldyń 4 maýsymynda Elbasy Nursultan Nazarbaev Memlekettik rámizder týraly zańǵa qol qoıǵan bolatyn.