Astanada Memleket basshysy Nursultan Nazarbaevtyń qatysýymen QR Prezıdentiniń janyndaǵy shetel ınvestorlary keńesiniń 31-shi plenarlyq otyrysy bastaldy.
Kún tártibine úsh suraq qoıylyp otyr. Eń aldymen, keńestiń 30-shy jalpy otyrysyndaǵy hattamalyq mindetterdiń atqarylýy týraly esep tyńdalady. Ekinshiden, sheteldik taraptyń ınvestısııalyq saıasat, energetıka, ekologııa jáne munaı-gaz salasy, eńbek zańnamasy, adam kapıtalyn damytý men sheteldik jumys kúshin tartý týraly keńesi aıtylady.
«Biz Táýelsizdik alǵannan keıingi jyldar áste ońaı bolǵan joq. Keńes odaǵynyń kúıreýi men daǵdarystan soń, Ońtústik-shyǵys daǵdarysy, 2007 jylǵy daǵdarys ótkenimen, Qazaqstan rezerviniń, ońtaıly sheshimniń arqasynda resessııaǵa jol bergen joq. Dese de, máseleler, qatelikter, kemshilikter barshylyq. Biraq, eń bastysy aıtaıyn degenim ınvestısııa boıynsha Qazaqstannyń kórsetkishi álemdik kórsetkishten joǵary jáne Qazaqstannyń jetistigi damyǵan elderdiń kórsetkishinen eki esege joǵary. Osynyń arqasynda Qazaqstan qazir damý ústinde. Biz osylaısha jańa baǵdarlamalardy júzege asyryp jatyrmyz», - dedi Nursultan Nazarbaev keńestiń ashylýynda.
Sonymen birge, otyrystyń negizgi kóteretin taqyryby - jedeldetilgen jańǵyrtý bolmaq. Aıta ketsek, sheteldik ınvestorlar keńesi qurylǵaly beri Memleket basshysynyń tóraǵalyǵymen 30 plenarlyq otyrys ótkizilgen. Ol otyrystarda aýqymdy túrde ózekti máseleler, atap aıtqanda eldegi shetel ınvestısııasynyń quqyqtyq rejimin jaqsartý, Qazaqstannyń sot júıesin jetildirý, salyq júıesin ońtaılandyrý men shetelden jumys kúshin tartý, QR ınvestısııalyq ımıdjin jaqsartý, bolashaq energııasy sekildi mańyzdy taqyryptar talqylanǵan. QR Prezıdentiniń tóraǵalyǵymen ótetin sheteldik ınvestorlar keńesi biregeı alań. Keńes eldiń ınvestısııa salasyna, Qazaqstandaǵy ınvestısııalyq klımatty arttyrýǵa qatysty ózekti máselelerdi sheshý úshin QR Úkimeti men shetel ınvestorlarynyń arasyndaǵy tikeleı dıalogty qamtamasyz etý maqsatynda 1998 jyly qurylǵan.