Bıyl jazǵy demalysta Qyzylorda oblysynyń bilim berý mekemelerindegi 1-10 synyptaǵy barlyǵy 136200 oqýshy oblystyq jáne respýblıkalyq jazǵy tynyǵý lagerlerinde, sport klýbtary men úıirmelerinde demalady.
Búgin oblys ákimi Qyrymbek Kósherbaev «Syrdarııa» lagerine baryp, demalyp jatqan balalarmen kezdesti. Munda 499 jetkinshek jazǵy demalysyn ótkizýde.
Aımaq basshysy balalarǵa jaqsy demalys tilep, syılyqtar tabystady.
«Densaýlyqtaryńdy nyǵaıtyp, jańa dos tabýǵa jáne jaqsy demalystan keıin qaıtadan oqýǵa kirisýlerińizge tilektespin», - dedi aımaq basshysy.
«Syrdarııa» lagerinde túrli tanymdyq jáne sporttyq úıirmeler uıymdastyrylǵan, balalar úshin ekskýrsııa ótkizý qarastyrylǵan.
Atap óteıik, 2017-2018 oqý jyly Qyzylorda oblysynda 136 astam oqýshy, nemese jalpy oqýshylar sanynyń 97 paıyzy, jazǵy demalyspen qamtylatyn bolady. Onyń ishinde 9 jazǵy tynyǵý lagerleri 7 aýysymda demalýshylardy qabyldasa, 111200 bala mektep janyndaǵy jazǵy lagerlerge barmaq.
Odan bólek, oqýshylar úshin aımaqtyń kórikti jerlerine ekskýrsııa men túrli sporttyq-tanymdyq seksııalar jáne úıirmelerdiń jumysy uıymdastyrylady.