Memleket basshysynyń bes áleýmettik bastamasynda aıtylǵan shaǵyn nesıeleý somasynyń 85 paıyzyn Úkimet kepildendirmek. Máselen, alynǵan bir mıllıon teńge nesıeniń 850 myń teńgesine Úkimet kepildik beredi, al qalǵan 150 myń teńge úshin nesıe alýshy aýyldaǵy malyn, jerin nemese basqa da jyljymaıtyn múlkin kepildikke qoıa alady. Úkimet úıinde ótken baspasóz máslıhatynda Eńbek jáne halyqty áleýmettik qorǵaý mınıstrligi halyqty jumyspen qamtý jáne eńbek naryǵyn damytý departamentiniń dırektory Jeńisbek Dýlatov shaǵyn nesıeleýde atqarylyp jatqan jumystarmen tanystyrdy.
Byltyrǵy jyly «QazAgroKepildik» AQ jáne «Damý» qory 414 nesıege kepildik bergen. 2017 jyly jalpy somasy 32 mıllıard teńge bolatyn 7200 shaǵyn nesıe berildi. Alaıda «Bastaý Bıznes» jobasy boıynsha bilim alǵan taǵy 5 myń adam óz isin bastaýǵa qajetti shaǵyn nesıelerdi ala almaǵan bolatyn. El Úkimeti 2018 jyly qosymsha 20 mıllıard teńge bólip, shaǵyn nesıelerdiń jalpy somasyn 62 mıllıard teńgege jetkizýdi kózdep otyr. Bıylǵy jyly shaǵyn nesıe alatyndardyń sany 2017 jylmen salystyrǵanda 2 esege artyp, 14 myń adamǵa jetetin bolady. Shaǵyn kásipkerlikke kepildik berýdiń úlesi de eselenip, 800 kepildik berý josparlanyp otyr. Prezıdenttiń bes áleýmettik bastamasynyń biri − «Shaǵyn nesıe berýdi kóbeıtý» boıynsha ózin-ózi eńbekpen qamtyǵan jáne jumyssyz turǵyndar arasynda jappaı kásipkerlikti damytý úshin jeńildikti shaǵyn nesıeler turaqty berilip keledi. Bul óz kezeginde shaǵyn jáne orta kásipkerliktiń el ekonomıkasyna qosar úlesin arttyrýǵa múmkindik beredi.
Erkejan AITQAZY,
«Egemen Qazaqstan»