Syrtqy ister mınıstrliginde Qazaqstan men Fransııa arasyndaǵy strategııalyq seriktestikke 10 jyl tolýyna oraı baspasóz konferensııasy ótti. Is-shara barysynda eki el arasyndaǵy seriktestiktiń serpindi tustary sóz boldy.
Jıynǵa «Qazaqstan-Fransııa» parlamentaralyq yntymaqtastyq tobynyń tóraǵasy, Májilis depýtaty Omarhan О́ksikbaev, Fransııanyń Ulttyq Assambleıa delegasııasy, «Fransııa-Qazaqstan» dostyq tobynyń tóraǵasy Per Kabare, «KATCO» jáne «Total» kompanııalarynyń ókilderi, sondaı-aq «Fransýz alıansy» qatysty.
Baspasóz konferensııasynda alǵash bolyp sóz alǵan O.О́ksikbaev byltyr Qazaqstan men Fransııa arasyndaǵy dıplomatııalyq qarym-qatynastyń ornaǵanyna 25 jyl tolǵanyna toqtalyp, ekijaqty áriptestiktiń qanat jaıyp kele jatqanyn atap ótti. On jyl buryn strategııalyq seriktestikke qol qoıylǵannan beri memleketter arasyndaǵy dostyq sapaly jańa deńgeıge jetkenin málimdedi.
«Ekijaqty baılanystardy damytýǵa Elbasy Nursultan Nazarbaev 2015 jyly qarashada Parıjge resmı sapary barysynda qol jetkizgen ýaǵdalastyqtar úlken serpin berdi dep nyq senimmen aıta alamyz. Qazirgi tańda Fransııa kompanııalary elimizdegi iri ınvestorlar qataryna kiredi. Saıası turǵyda ekijaqty kún tártibindegi negizgi máseleler boıynsha ózara túsinistiktiń joǵary deńgeıine qol jetkizildi», dedi O.О́ksikbaev.
Budan keıin «Fransııa-Qazaqstan» dostyq tobynyń tóraǵasy P.Kabare sóz alyp, aıtýly datany atap ótýge arnalǵan jıynǵa shaqyrǵany úshin Qazaqstan tarapyna alǵysyn jetkizdi.
«Qazaqstan qaryshtap damýymen álemge úlgi bolyp otyr. Osydan az ýaqyt buryn ǵana Astana shaǵyn qala edi, qazirgi tańda záýlim ǵımarattar boı kóterip, kórikti shaharǵa aınalyp keledi», dedi P.Kabare.
Sondaı-aq Fransııadan kelgen ókil ekijaqty qarym-qatynastyń nyǵaıýyna óz eliniń de múddeli ekenin jetkizdi.
«Strategııalyq seriktestiktiń mańyzdylyǵynyń bir sebebi – osy kelisim arqyly Qazaqstanǵa keletin sheteldik ınvestorlardyń sany artady. Onyń ústine, Qazaqstan – Ortalyq Azııadaǵy bizdiń mańyzdy áriptesimiz. Osy on jyl ishinde strategııalyq seriktestik jańa deńgeıge kóterildi. Búginde Qazaqstan Shyǵys pen Batysty baılanystyratyn kópir ispetti», dedi P.Kabare.
Sonymen qatar jıyn barysynda yntymaqtastyqty budan ári damyta túsýdiń múmkindikteri, elimizdegi fransýz ınvestorlarynyń áleýeti, Qazaqstanda bızneske jasalǵan qolaıly jaǵdaı sóz boldy.
Abaı ASANKELDIULY, «Egemen Qazaqstan»