Keshe Qazaqstan Respýblıkasynyń Tuńǵysh Prezıdenti–Elbasy kitaphanasynda elordanyń 20 jyldyǵyna arnalǵan «Astana – bolashaqtyń qalasy» atty is-shara ótkizildi.
Is-sharanyń negizgi maqsaty – elordaǵa qurmet pen maqtanysh sezimin qalyptastyrý, ómirde belgili tabystarǵa qol jetkizgen jas astanalyqtardyń beıneleri arqyly belsendi ómirlik ustanym men kóshbasshylyq qasıetterdi nasıhattaý.
Kezdesý qońaqtary – Astananyń qurdastary, 1998 jyly týǵan jastar, naǵyz elordalyqtar. Olardyń árqaısysy ózderiniń bilim alyp jatqan oqý oryndary, sonymen qatar ózderiniń tabystary men jeńisteri týraly baıandady. Olardyń ishinde G. Ábdirahmanova, A.Ábdiǵalıev, Á.Aımaq, A.Beısova, A.Boıko, Iа.Kalınovskıı, A.Qasen, E.Seıtjaǵypar sóz sóıledi. О́z mamandyǵyn súıip oqıtyn elordanyń jastary elimizdiń damýyna óz úlesterin qosqysy keledi.
L.N.Gýmılev atyndaǵy Eýrazııa ulttyq ýnıversıtetiniń 2-kýrs stýdenti Aıkerim Qasen fılologııa mamandyǵy boıynsha oqıdy. Bolashaqta ol bilimin ári qaraı jetildirip, óz mamandyǵy boıynsha shetelde tereńirek oqýdy maqsat tutyp otyr. «О́zge tildiń bárin bilseń de, damý, tynymsyz eńbektený arqyly básekelestikke qabilettiliktiń arqasynda ǵana óz ultyńdy, tilińdi, dinińdi, dástúrińdi saqtap qala alasyń», deıdi Aıkerim.
Astana gýmanıtarlyq kolledjiniń 2-kýrs stýdenti Elbarys Seıtjaǵypar mýzykaǵa bala kúninen jaqyn bolǵan. «Elordadaǵy №4 Jambyl Jabaev atyndaǵy mektep-gımnazııasynda oqı júrip, sabaqpen qatar túrli mádenı sharalarǵa belsene aralastym. Talabym men talantymdy tanyǵan ata-anam meniń óner salasyna baýlydy. Sebebi anam da, ákem de ónerli jandar. Osyndaı ónerli otbasynda dúnıege kelgen men Astana gýmanıtarlyq kolledjiniń mýzykalyq bilim berý mamandyǵyna oqýǵa tústim», deıdi Elbarys.
Iаn Kalınovskıı bala kúninen sportqa jaqyn bolyp ósken. «Meniń súıikti sportym – hokkeı. Hokkeımen tórt jasymnan bastap aınalysyp kelemin. Men sporttaǵy jetistikke ata-anamnyń arqasynda jettim dep bilemin. Aldaǵy ýaqytta Qazaqstanda hokkeıdiń qarqyndy damýyna óz úlesimdi qosqym keledi». Elordanyń qurdasy Iаnnyń armany osyndaı.
Saltanatty is-sharaǵa Qazaqstan Respýblıkasynyń Tuńǵysh Prezıdenti – Elbasy kitaphanasy dırektorynyń orynbasary Ámirhan Rahymjanov qatysyp, elordanyń qurdastaryna reseılik jazýshy Nıkolaı Zenkovıchtiń «Imıa, stavshee epohoı. Nýrsýltan Nazarbaev: novoe prochtenıe bıografıı» atty kitabyn syıǵa tartty.
Mırajan MAHAN, L.N.Gýmılev atyndaǵy EUÝ stýdenti