«Jaqynda Úrjar aýdanyna baryp qaıttym. Barǵanda aýdan ortalyǵyna deıin ushaqqa 10 myń teńge tóledim. О́skemenge qaıtaıyn dep áýejaıǵa kelsem bılet baǵasy 22 myńnan asyp jyǵylypty. Ne bolsa da bılet alaıyn dep kassaǵa barsam, «ushaq ushpaıdy» dedi. «Nege?» desem, «ushatyn kisi joq» deıdi. Árıne 22-23 myńǵa kim ushsyn?! Astana men Almatydan qatynaıtyn baǵyttardyń baǵasynan da joǵary. Budan keıin Alakólge demalýshylar qaıdan kelsin?! Sýǵa shomylý maýsymy kezinde baǵany tómendetkenniń ornyna kótergenderin qalaı túsinemiz?» deıdi О́skemen qalasynyń turǵyny, jazýshy Álibek Qańtarbaev.
Mán-jaıdy bileıik, turǵyndar tarapynan túsip jatqan ótinish-tilekterdi jetkizeıik dep oblystyq jolaýshylar kóligi jáne avtomobıl joldary basqarmasyna habarlastyq. Basqarmanyń jolaýshy kóligi bóliminiń basshysy Aıjan Rahymbaevamen sóıleskenimizde, ol «О́skemen-Úrjar» áýe baǵytynyń baǵasy 1 maýsymǵa deıin 10 myń teńge bolǵanyn, buǵan oblystyq bıýdjetten arnaıy sýbsıdııa bólingenin, al 1 maýsymnan bastap ushaq baǵasy 22 myń teńgege deıin qymbattaǵanyn aıtty. «Bıýdjetti ońtaılandyrý úshin jazda kommersııalyq baǵytqa aýysqan bolatynbyz. Degenmen de bul máseleni qaıta qarastyrýǵa ázirmiz. Eger jolaýshylar 22 myńdy qaltaǵa salmaq salady dep jatsa, burynǵy baǵasyn qaıta qalpyna keltirýge bolady», deıdi bólim basshysy.
Oblystyq týrızm jáne syrtqy baılanystar basqarmasyna qarasty týrıstik aqparattyq ortalyqtyń bergen málimetterine súıensek, qazirgi ýaqytta Úrjarǵa úsh áýe baǵyty qarastyrylǵan. Olar – «О́skemen – Semeı-Úrjar», «Almaty – Úrjar», «Astana – Úrjar» baǵyttary. 2018 jyly sýbsıdııa retinde «О́skemen – Semeı – Úrjar» baǵytyna oblystyq bıýdjetten 162 mln, respýblıkalyq bıýdjetten «Almaty-Úrjar» baǵytyna 71 mln, «Astana-Úrjar» baǵytyna 63 mln teńge bólinipti. Atalǵan áýe baǵyttaryna kóz salsańyz, Astana (19 500 teńge) men Almatydan (16 myń teńge) Úrjarǵa tikeleı qatynaıtyn ushaqtardyń baǵasy О́skemen men Semeıden (22 myń teńgeden bastalady) áldeqaıda arzan ekenin ańǵarasyz.
TúıinUshaqtyń jaıy ázirge osyndaı bolyp tur. Qatynas máselesin qozǵaǵannan keıin Alakólge júredi delingen poıyz jaıynda da aıtpasqa bolmaıtyn sekildi. Jaqynda gazetimizde «Alakólge 15 maýsymnan bastap poıyz júredi», «plaskarttyń baǵasy – 2800, kýpeniń baǵasy – 4000 teńge bolady» dep oqyrmandardan súıinshi suraǵan bolatynbyz. Jaǵymdy jańalyqty oblys ákimi Danıal Ahmetov Úrjar aýdanyna jasaǵan jumys sapary barysynda jetkizgenin de aıtqanbyz. «Jón bolǵan eken. Áıtpese Úrjardyń jolymen Alakólge jetkenshe silikpemiz shyǵyp júrýshi edi» dep biraz jurt qýanyp, alǵystaryn jaýdyryp edi. Endi mine sońǵy aptalarda: «Alakólge poıyz júre me, júrmeı me? Naqtysyn aıtyńyzdarshy», dep temir jol vokzalyna habarlassaq, «bizde ondaı aqparat joq» degen jaýap aldyq.
Azamat QASYM,
«Egemen Qazaqstan»
Shyǵys Qazaqstan oblysy