«Pamıat» qoǵamdyq qorynyń tóraǵasy, Soltústik Qazaqstan oblysynyń qurmetti azamaty Bolat Saǵyndyqovtyń bastamasymen Bostandyq aýylynda qýǵyn-súrgin qurbandaryna arnap eskertkish-taqta ornatyldy.
Atalmysh sharaǵa bozdaqtardyń týǵan-týysqandary, zııaly qaýym ókilderi men jergilikti turǵyndar qatysty. Saltanatty rásimde sóılegen sózinde Bolat Maǵazuly eskertkish-taqtaǵa Muhamedııa Áshetov, Sapar Láımishov, Ǵabdýsalám Bekkenın, Hamzat Izrapılov, Qalımolda Qarabatyrov, Hamıt Múrsilimov, Ábikeı Mahambetov, Sultan Tilegenov, Nuǵyman Orańkın, Maǵaz Saǵyndyqov, Emıaman Rahmetov syndy osy aýylda týǵan jáne eńbek etken 11 azamattyń esimderi jazylǵanyn jetkizdi.
«Bul eskertkish-taqta qýǵyn-súrgin qurbandaryna emes, olardyń esimderin keıingi óskeleń urpaqtyń bilip ósýi, qadir tutýy úshin qajet. Olardyń eńbek joly men ne úshin opat bolǵanyn tanytý – biz úshin paryz. Tek bizdiń aýdan boıynsha ǵana 250-den astam adam zulmat zamannyń qurbany boldy. «О́li rıza bolmaı, tiri baıymaıdy»», dedi óz sózinde Mamlıýt aýdanynyń ákimi Jastilek Syzdyqov.
Pedagogıkalyq qyzmettiń ardageri, osy aýyldyń týmasy Qajymurat Násıev Bostandyqpen birge kórshi Bekseıit jáne joıylyp ketken Úshkól aýyldarynan qurban bolǵan azamattardy qamtıtyn «Qýǵyn-súrginniń azaly tarıhy» atty kitapshany jergilikti mektep pen aýyldyq kitaphanaǵa, bozdaqtardyń urpaqtaryna tartý etti.
Aýyldastary Bolat aǵamyzdyń týǵan jerinde de tamasha bir ıgilikti sharaǵa bastamashy bolyp, úlgi-ónege bolarlyq isti júzege asyrǵanyna rızashylyqtaryn bildirdi.
О́mir ESQALI, «Egemen Qazaqstan»