Jazǵy demalysty durys paıdalanyp, alys-jaqyn shetelderge týrıstik saparmen baryp, sátti demalǵanǵa ne jetsin. Osyǵan oraı jyl saıyn qazaqstandyqtar shetelge týrıstik saparmen aǵylyp jatady. Biraq keıde otandastarymyz kútpegen jaǵdaıǵa tap bolyp, týrıstik saparda kezdesken túrli keleńsizdikten demalys shyrqy buzylady. Onyń basty sebebi, týrıstik qyzmet kórsetý barysynyń oıdaǵydaı uıymdastyrylmaýynan týyndaıdy. Mundaı jaǵdaıda demalystyń sátti ótýine ne kepildik bola alady? Búgingi bul suraǵymyzǵa advokat Seıfýlla Shyńǵys jaýap beredi.
– Bul oraıda birden aıtarymyz, týrıstik qyzmet kórsetý sharty josparlanǵan demalysyńyzdyń sátti ótýiniń naqty kepili bola alady. Árıne jazǵy demalys kezeńi jappaı bastalysymen kóptegen týroperatorlar jáne týragenttik kompanııalar da óz jumystaryna qyzý kirisip, halyqqa ártúrli týrıstik marshrýttardy usynady. Sonda aldymen, týroperatormen nemese týragenttik kompanııasymen arada túziletin kelisimshartty muqııat oqyp, asyqpaı tanysyp shyǵý, aldaǵy demalysyńyzdyń jaqsy ári kóńildi ótýine jol ashady. Sebebi búginde keıbir kompanııalar «jeńildiń ústimen» júrmek bolyp, zańda bekitilgen Týrıstik qyzmet kórsetý shartynyń ornyna moıyndaryna artylǵan mindettemelerdi oryndamaýdyń syltaýy retinde Qyzmet kórsetý týraly shart jasaýdy usynady. Máselen, «Qazaqstan Respýblıkasyndaǵy týrıstik qyzmet týraly» zańy tutynýshynyń quqyqtaryn qorǵaýdyń birqatar tetikterin qarastyrǵan. Atap aıtqanda, zańnyń 17-babynda saıahat barysynyń nasharlaýy, saıahat merziminiń ózgerýi nemese kólik tarıfteriniń oılamaǵan jerden ósýi oryn alǵan jaǵdaıda taraptardyń árqaısysynyń shartty ózgerte alý nemese buzýdy talap etý quqyǵy qarastyrylǵan.
Sonymen qatar týrıstik qyzmetti júzege asyratyn tulǵaǵa shartty oryndaýdan bas tartý týraly habardar etilgenge deıin, ıaǵnı qyzmet túrlerine qarjy tólenip qoıylǵan bolsa da, saıahat bastalmaı turyp shartty oryndaýdan bas tartý quqyǵy saqtalady. Taǵy bir mańyzdy talap, týroperatorda jáne týragentte týroperatordyń jáne týragenttiń azamattyq-quqyqtyq jaýapkershiligin mindetti saqtandyrýdyń jaramdy sharty bolǵan kezde ǵana týroperatorlyq jáne týragenttik qyzmetti júzege asyrýǵa ruqsat etiledi.
Demek, demalys kezinde tutynýshynyń ómiri men densaýlyǵyna zalal kelgen bolsa, saqtandyrý kompanııasy saqtandyrý tólemaqysyn óteıdi. Bul zańda qarastyrylǵan mańyzdy másele. Buǵan tutynýshy týroperatormen nemese týragentpen týrıstik qyzmet shartyn jasasqan jaǵdaıda ǵana qol jetkize alady. Al eger tutynýshy týrıstik kompanııanyń aıtqanyna erip, Týrıstik qyzmet kórsetý shartynyń ornyna ótelmeli Qyzmet kórsetý týraly shart jasasa, onda atalǵan quqyqtardan aıyrylýy bek múmkin. Sebebi mundaı áreketke barǵan kompanııanyń pıǵyly aıtpasa da túsinikti. Shart jasardyń aldynda týrıstik marshrýtty ázirlegen týrıstik operatordyń naryqta qansha ýaqyt qyzmet istep kele jatqandyǵyn bilip alǵan jón. Tańdaý kezinde, ásirese demalys oryndarynyń arzan baǵasyna emes, týroperator kompanııasynyń senimdiligine nazar aýdarý kerek dep keńes beremiz. Sonda bir jyl asyǵa kútken demalysyńyzdyń sátti óterine kúmánińiz bolmaıdy.
Daıyndaǵan Aleksandr TASBOLAT, «Egemen Qazaqstan»