Keshe Oral qalasynda HHI ǵasyr bastalǵaly jol erejesin bir márte de buzbaǵan, aıypqa tartylmaǵan taksı júrgizýshilerin Oral qalalyq Jergilikti polısııa qyzmeti basqarmasy erekshe quttyqtady.
Bir qyzyǵy, taksı júrgizýshileri polısııanyń mundaı erekshe shara daıyndap jatqanynan habarsyz bolypty. Ádettegideı «tapsyrys» alyp, klıentin dittegen jerine jetkizý úshin Oraldyń ortalyq saıabaǵy janyndaǵy P.Atoıan stadıonyna jaqyndap kelgen Naýryzbaı Kóbjanov pen Sergeı Proshın forma kıgen polısııa qyzmetkerlerin, qaptaǵan jýrnalısterdi kórip ań-tań qaldy. Tilshiler qaýmalap, foto men beınekameraǵa túsirip, al polısııa qyzmetkeri arnaıy alǵys hat usynǵanda ǵana mán-jaıdy túsinip, qýanyshtan júzderi bal-bul jandy.
– Bul júrgizýshiler sonaý 1999 jyldan beri bir de bir ret jol apatyna urynbaǵan, ereje buzbaǵan. Tipti «jol erejesin saqtaý – ár júrgizýshiniń kúndelikti saqtaýy tıis qarapaıym qaǵıdasy emes pe?» dep qarapaıymdylyq tanytyp tur. Qalamyzdyń barlyq júrgizýshisi osyndaı jandardan úlgi alsa, – deıdi Oral qalalyq Ishki ister basqarmasy Jergilikti polısııa qyzmetiniń aǵa ınspektory, polısııa maıory Dınara Ábdýlqalyqova.
Qazybek QUTTYMURATULY,
«Egemen Qazaqstan»