Almaty qalasynyń Tilderdi damytý basqarmasy «Rýhanı jańǵyrý» baǵdarlamasynyń aıasynda Memlekettik qyzmetshiler kúnine oraı memlekettik «Memlekettik til – memlekettik qyzmette» qalalyq baıqaýyn ótkizdi.
Qazaq tiliniń qoldanylý aıasyn keńeıtýdi, memlekettik til saıasatyn nasıhattaýdy maqsat etetin baıqaý Almaty qalasynyń alty aýdany boıynsha ótkizildi.
Qatysýshylar memlekettik til saıasatyna, til týraly zańnama men memlekettik baǵdarlamalarǵa qatysty suraqtarǵa jaýap berip, til týraly qanatty sózder, maqal-mátelderdi jatqa aıtty. Qazaqstandaǵy tanymal jerlerge qatysty suraqtarǵa jaýap berip, ár top kezekpen mýzykalyq teatrlandyrylǵan qoıylymda ónerlerin kórsetti.
Til saıysy barysynda Almatynyń Almaly aýdany Bas júldeni jeńip aldy. Al I oryn Alataý aýdanynyń, II oryn – Jetisý, III Naýryzbaı aýdanynyń enshisine tıdi. «Sálemdesý», «Kerek derek», «Sóz marjany», «Kıeli meken», «Ana tilim – án-jyrym» sııaqty bes kezeńnen turatyn baıqaýda baq synap, ozyp shyqqan memlekettik qyzmetkerlerge dıplomdar men baǵaly syılyqtar tapsyryldy.
Elvıra Serikqyzy,
«Egemen Qazaqstan»