Parlament Májilisiniń tóraǵasy BAQ ókilderin «Parlament sózi» syılyǵymen marapattady.
«Qalam terbegen aqparat ókilderi elimizdiń aınasy bolyp otyrsyzdar. Sebebi elimizdiń damý jolyndaǵy barlyq jańalyqtar, barlyq ózgerister BAQ arqyly baıtaq elimizge, barsha álemge taraıdy. Barshańyzǵa belgili, Elbasymyz elimiz Táýelsizdik alǵan kúnnen bastap Qazaqstandaǵy barlyq aqparat quraldaryna erekshe nazar aýdaryp, árqashan úlken kómek kórsetip turady. Sonyń nátıjesinde, elimizdiń aqparat quraldarynda búginde myńdaǵan kásibı mamandar jumys isteıdi, úzdik tehnıkalarmen, tehnologııalarmen qamtylǵan. BAQ-ty elimizdegi mańyzdy salanyń biri dep aıtýǵa bolady. Barshalaryńyz osy salada tabysty eńbek etip, ózderińizge júktelgen jaýapkershilikti zor abyroımen atqaryp kelesizder. Sizderge qandaı qurmet kórsetsek te, artyq bolmaıdy», dedi Májilis tóraǵasy Nurlan Nyǵmatýlın BAQ ókilderin tól merekelerimen quttyqtaý kezinde.
Bıyl baıqaýǵa qatysýshylar sany byltyrmen salystyrǵanda, eki ese kóp bolǵan.
«Osymen ekinshi ret Úlken Májilis zalynda «Parlament sózi» syılyǵymyzdy tapsyrǵaly otyrmyz. «Parlament sózi» - ol árıne, eldiń sózi, halyqtyń sózi. Ony sizder árbir otbasyna, memleketimizdiń ár azamatyna jetkizip júrsizder. Ony kúnde oqımyz da, kórip te kelemiz. Sondyqtan depýtattyq korpýs atynan rızashylyǵymyzdy bildiremiz», dedi Májilis tóraǵasy.
Sonymen, «Parlamenttik jýrnalıstıkany damytýǵa qosqan úlesi úshin» atalymynda belgili jazýshy Ǵadilbek Shalahmetov marapattaldy. Osy atalymdaǵy syılyq tanymal jýrnalıst Tatıana Kostınaǵa da tapsyryldy.
«Úzdik ınternet jáne radıo materıal úshin» atalymynda syılyq «QazAqparat» HAA sarapshysy Muratbek Maqulbekov pen «Nur.kz» ujymyna berildi.
«Úzdik televızııalyq sıýjet» atalymynda «Habar» telearnasynyń tilshisi Gúljan Marqabaeva men «31 arnanyń» tilshisi Ilıa Rybın laýreat dep tanyldy.
«Úzdik baspa jarııalanymy úshin» atalymynda «Eqemen Qazaqstan» gazetiniń saıasat jáne quqyq bóliminiń meńgerýshisi Joldybaı Bazar men «Vremıa» gazetiniń tilshisi Leıla Tastanova jeńimpaz boldy.
Sonymen qatar «Arnaıy reportaj» atalymynda laýreat bolyp «KTK» telearnasynyń tilshisi Jáýdir Orazhanova ataldy.
Al «Parlament sózi» syılyǵynyń «Úzdik vıdeo jáne foto materıal» atalymynda «1 kanal «Evrazııa» operatory Rýstam Abeldınov pen «Bestnews.kz» AA fototilshisi Janar Serdalına marapattaldy.
Jeńimpazdarǵa arnaıy tapsyryspen jasalǵan Parlament beınesindegi músinder men dıplomdar tabys etildi.
Esterińizge sala keteıik, «Parlament sózi» syılyǵy alǵash ret 2017 jyly tapsyrylǵan.