Búgingideı jyldam damyp, sát saıyn ózgerip otyrǵan qoǵamda bilimdi urpaqty tárbıeleý basty maqsattardyń biri ekeni anyq. Elimizde bilim men ǵylymǵa umtylǵan jas tolqyn osy maqsatty alǵa qoıyp, batyl qadamdarmen alǵa júrip keledi. Búgingi jastardyń baqytyna oraı ǵylymmen shuǵyldanyp, ıdeıa bólisip, ony júzege asyrýǵa múmkindikter bar ekeni qýantady. Ár bilim mekemesi oraıyn taýyp, jastarǵa jiger berip, qoltyǵynan demep otyrý naǵyz izdenistiń kórinisi deýge bolady.
Osy oraıda №9 mektep-gımnazııasynyń 10-synyp oqýshylary Baýyrjan Kabdýllın men Ádil Shabdenov Qazaqstannyń Fransııadaǵy Tótenshe jáne ókiletti elshisi Jan Ǵalıevtiń qatysýymen naýryz aıynyń 28-juldyzynda Parıj qalasynda ótken halyqaralyq «Art-Baiterek Paris» konkýrs-festıvaline qatysyp, óz ónerlerin kórsetti. Jas daryndar «Bıe sútinen jasalǵan shıpaly balmuzdaq» (Jetekshisi: Abdrahmanova A.A.) atty jobasyn tanystyryp, «Balsaýmal» atty balmuzdaǵynan Fransııa jurtshylyǵyna dám tatqyzdy. Bul jobaǵa elimizdiń mádenıet qaıratkeri, ánshi Tamara Asar, elshilik qyzmetkerleri, halyqaralyq blogerler, jýrnalıster, «Fýdmaster» balmuzdaq kompanııasynyń ókilderi qyzyǵýshylyq tanytty. Jas daryndarymyzdyń aldaǵy josparlaryna túrtki bolatyndaı usynystar aıtyldy.
Festıval aıasynda halyqaralyq «Soıýz talantov» shyǵarmashylyq ortalyǵynyń uıymdastyrýymen HHVII halyqaralyq «Parıj, men seni súıemin!» shyǵarmashylyq konkýrsyna mektebimizdiń 11-synyp oqýshysy Aqmaral Baqytbek (Jetekshisi: Beketaı B.A.) «Mánerlep oqý» nomınasııasy boıynsha óner kórsetip, júldeli I orynǵa ıe boldy. Qazylar alqasy sheshimimen, Aqmaralǵa Peterbýrgte ótetin maýsymdyq konkýrsqa qatysýǵa joldama berildi. Osy rette shákirtterdiń jetistikke jetýine múmkindik týǵyzǵan mektep dırektory B.Kýshekovaǵa, ata-analar Baqytbek Aqsolı, Sarjan Shabdenov, Shortanbaı Kalmaǵanbetovke alǵysymyzdy bildiremiz. Táýelsiz elde bılik tutqasyn ustap, qýatty el azamattaryna aınalatyn jastarǵa ata-analardyń ınvestısııa quıýy strategııalyq turǵydan utymdy sheshim dep oılaımyz. О́ıtkeni olardyń búkil ómiri alda jáne bolashaǵy zor. Jastarǵa júkteletin mindet te salmaqty. Olar tamasha bilim alyp, ómir súrý deńgeıin arttyrýǵa, ekonomıkany damytyp, azamattyq qoǵamdy qalyptastyrýǵa, zııatkerlik ult tárbıeleý jáne basqa da kóptegen paıdaly ári jaǵymdy nárselermen aınalysýǵa talpynady. Bul jetistikter mektep úshin aýqymy keń, tarıhy tereń jáne bolashaǵy zor múmkindikter. Sondyqtan da osyndaı bıik jetistikke jetken darhan dalanyń daryndy shákirtteri kóbeıe bergeı.
Baıan BEKETAI, №9 mektep-gımnazııasy dırektorynyń beıindi oqytý jónindegi orynbasary
Aqmola oblysy, Býrabaı aýdany