Adam balasynyń aıryqsha múmkindigine anyqtama berýge keıde ǵalymdardyń ózderi jaýap tappaı qalyp jatady. Sırktegi bir ártister uzyndyǵy jarty metrge jetetin tik qylyshty saýmalap otyryp, qundaǵyna deıin jutyp qoıady. Budan ózge de adam mıyna syımaıtyn trıýk isteıtinder kóp. Al Qyzylorda qalasynyń turǵyny, erdiń jasy elýden mol asqan Nartaı Tursynovtyń sırkke esh qatysy joq. Nartaıdyń keýdesinde alyp bir magnıt ornalasqan sııaqty, temir taqasań jabysa qalady.
Salmaǵy 95 kılo tartatyn jigit aǵasy búginde tósimen 110 kılodaı temirdi jabystyryp kótergende esh aýyrlyǵyn sezinbeıdi. Bul qasıetin jıyrma jyl buryn baıqaǵan eken. Alǵashqyda qyryq kıloǵa deıin kóterip júrgen, búginde júz kılodan asyrdy. Nartaıdyń keýdesine tek temir-tersek qana jabysa bermeıdi. Shyny ydystar men plastmassa buıymdar da tartylady.
Nartaı óz qasıetin boıyndaǵy bıotoginiń erekshe moldyǵymen túsindiredi. Biraq kezinde Keńes Odaǵyn shýlatqan bıotogi kóp Kashpırovskıı, Chýmak sııaqty emshi bolýǵa yqylasy joq.
Qoldyń demeýinsiz óz salmaǵynan asatyn temir-tersekti tósimen kóterip júrgen azamat óz múmkindigin Alla bergen qasıet dep uǵady.
Baqtııar TAIJAN, «Egemen Qazaqstan»
Qyzylorda oblysy