Almatydaǵy Tólebaev kóshesiniń №162 úıinde belgili memleket jáne qoǵam qaıratkeri Maqtaı Saǵdıevke ornatylǵan memorıaldyq taqtanyń saltanatty ashylý rásimi ótti.
1929 jyly Soltústik Qazaqstan oblysynyń Esil aýdanynda týǵan Maqtaı Saǵdıev jastaıynan qara jumysqa aralasyp, keıinnen kóptegen basshylyq qyzmette boldy. Atap aıtsaq, Sokolov jáne Jambyl aýdandyq partııa komıtetteriniń birinshi hatshysy, Torǵaı oblysy atqarý komıteti tóraǵasynyń birinshi orynbasary, Qazaq KSR balyq sharýashylyq mınıstri, Qostanaı oblysy atqarý komıtetiniń tóraǵasy, Kókshetaý oblysy partııa komıtetiniń birinshi hatshysy, Qazaq KSR-i Joǵarǵy Keńesi Tóralqasynyń tóraǵasy, Qazaq KSR-i Prezıdenttik keńesiniń múshesi jáne Qazaq KSR-i Prezıdenti janyndaǵy Azamattyq jónindegi komıssııanyń tóraǵasy qyzmetterin atqardy. 1991 jyldan Qazaqstan Respýblıkasy Ardagerler uıymy ortalyq keńesin basqardy. Al 1999-2004 jyldar aralyǵynda Parlament Májilisiniń depýtaty boldy.
Belgili memleket jáne qoǵam qaıratkeri turǵan úıde ornatylǵan memorıaldyq taqtanyń saltanatty ashylý rásiminde Parlament Májilisi tóraǵasynyń orynbasary Vladımır Bojko men Almaty qalasy ákiminiń orynbasary Arman Qyryqbaev qatysty. Ár jyldary birge qoıan-qoltyq eńbek etken Marat Nýrıev, Sultan Jıenbaev, Sháńgereı Jánibekov, Vera Sıdorova jáne Evgenıı Ejıkov-Babahanov syndy áriptesteri, úzeńgiles dostary men shákirtteri Maqtaı Saǵdıevtiń eńbek joly, azamattyq bolmysy, biliktiligi men iskerligi, oı-óresi men parasaty jaıynda keńinen baıandaı kele, basqa da qyzyqty oqıǵalar men jaıttar týraly tartymdy áńgimelerdiń tıegin aǵytty. Sondaı-aq osy rásimde sóz alǵan Maqtaı Ramazanulynyń qyzy Ǵalııa da ákesi jaıynda estelik aıtty.
Ǵalym SÚLEIMEN, «Egemen Qazaqstan»
ALMATY