«Azamattarǵa arnalǵan úkimet» memlekettik korporasııasy QR IIM jáne «Ulttyq aqparattyq tehnologııalar» AQ-men birlesip, elektrondyq úkimet portalynda jańa servısti pılottik rejımde iske qosty. Endi qazaqstandyqtar avtokólikterin onlaın tártipte tirkeı alady, dep habarlady «Azamattarǵa arnalǵan úkimet» memlekettik korporasııasy» KE AQ baspasóz qyzmeti.
Eger azamattyń elektrondyq-sıfrlyq qoltańbasy bolsa, mamandandyrylǵan halyqqa qyzmet kórsetý ortalyǵy nemese IIM tirkeý-emtıhan bólimshelerine barmaı-aq,avtokólikterin elektrondyq úkimet portalynda rásimdeı alady.
«Vedomstvoaralyq komıssııanyń aıasynda biz memlekettik qyzmetterdi ońtaılandyrý jumystaryn júrgizýdemiz. Avtokólikterdi tirkeý qyzmetine degen suranys qarqyndy túrde ósip kele jatqandyqtan, biz bul qyzmetti elektrondyq nusqaǵa aýystyrý týraly usynys jasadyq. Bul jańashyldyq qyzmet alýshylardyń ýaqytyn únemdep qana qoımaı, sondaı-aq mamandandyrylǵan HQO-daǵy júktemeni azaıtýǵa múmkindik beredi. Máselen, bizdiń korporasııa arqyly bıylǵy bes aıda avtokólikti tirkeý jáne qaıta tirkeý boıynsha 745 592 qyzmet kórsetildi», - dedi «Azamattarǵa arnalǵan úkimet» basqarmasynyń tóraǵasy Abylaıhan Ospanov.
Portal arqyly ótinim bergende, eshqandaı qujattyń skan-nusqasyn usynýdyń qajeti joq, sebebi qajetti málimetterdiń barlyǵy aqparattyq júıeler arqyly alynady.
«Buǵan deıin kólikti satýshy men satyp alýshy ótinim berý úshin bir ýaqytta «Azamattarǵa arnalǵan úkimettiń» front-ofısine baryp, qajetti qujattardy tapsyrýy tıis edi. Endi azamattar ótinimdi úıden shyqpaı-aq, onlaın tártipte joldaı alady. Elektrondyq úkimet portaly arqyly biz aldaǵy ýaqytta taǵy da biraz memelkettik qyzmetterdi alý prosesin jeńildetpekpiz», - deıdi «Ulttyq aqparattyq tehnologııalar» AQ basqarma tóraǵasy Áset Turysov.
Qyzmetti onlaın alý úshin egov.kz portalynda avtorızasııadan ótip, satylatyn kólik jaıly aqparatty engizip, aıyppuldar men salyq tólemderin, tehnıkalyq jaǵdaıyntekserýge suranys joldaý kerek. Eger qaryzdar bolsa, elektrondyq portal arqyly óteýge bolady. Munan keıin avtokólikti satyp alýshy azamat elektrondyq úkimet portalyndaǵy jeke kabıneti arqyly satýshy qaldyrǵan ótinimmen tanysyp, aıyppuldardy teksergennen keıin nómir belgisine, kólik quralyn tirkeýge jáne tirkeý týraly kýálikke tólem jasaı alady. Satyp alýshy óziniń ESQ-men smart-kelisimdi rastaǵan soń mamandandyrylǵan HQO-ǵa nómir belgisin alyp ketý úshin ǵana keledi. Sondaı-aq nómirdi úıge jetkizý qyzmetine de tapsyrys berýge bolady.
Eske sala keteıik, bıylǵy mamyr aıynan bastap QR IIM avtokólikti tirkeý kezindegi salystyrýdy alyp tastaǵan bolatyn. Endi esepten shyǵarý nemese kólikti tirkeý kezinde nómirlik agregatty teksertýdiń qajeti joq. Mundaı talap tek kólikti alǵashqy ret tirkegende qoıylady. Sondaı-aq júrgizýshi kýáliginiń merzimi ótkenge deıin aýystyrý nemese joǵaltyp alǵan jaǵdaıda medısınalyq tekseristen ótýdiń jáne psıhıatr, narkologtan anyqtama ákelýdiń qajeti joq. Al azamattyń ESQ-sy bolsa, júrgizýshi kýáligin elektrondyq úkimet portaly arqyly onlaın tártipte aýystyrýǵa bolady.