Qabaǵynan qar jaýǵan qart Tarbaǵataı jyraqtan qarasań tym sýyq, susty. Qarly shyńdarynyń etegi bulyńǵyr tartyp dymdanyp turady. Qysynyń qary qalyń, jazy salqyn bul óńir eshkimdi de jatsynbaıdy. Jaqyndap qoınyna ene berseń senen jylýyn aıamaıdy. Baýyryna basyp, balasyndaı mápeleıdi.
...Toqsanynshy jyldary elge jańa júıe enip, árkim jeke otaýyn quryp jatqanda Qarashevtar «Iýbıleınyı» JShS-in quryp, bir kezderi «Aksakovka», «Iýbıleınyı» atalǵan keńshardy ydyratýǵa jol bermeı, saqtap qalýǵa kúsh saldy.
– Bastapqyda bul isimizge kúdikpen qaraıtyndar kóp boldy, – deıdi búginde «Iýbıleınyı» JShS basshysy Mamyrbek Qarashev. – Ujymdy taratpaı, «bir jaǵadan bas, bir jeńnen qol» shyǵara, birlese eńbek etý bastamasyn qoldaýdan góri keri tartatyndardyń kóp bolatyny belgili ǵoı. «Qyryq kisi bir jaq, qyńyr kisi bir jaq» bolyp bir júıege kelgenshe ári-sári kúı keshkenimiz ras.
Uzaq jolǵa shyqqan kerýen júgin tez túzep aldy. Tarbaǵataıdyń qoınaýynda otyrǵan aýyl jurtshylyǵy ózgeden kómek kútpeı, óz eńbekterine arqa súıedi. Aırandaı uıyǵan Kóldeneń atty alaqandaı aýyldyń ataǵy alysqa tarady. 1994 jyly Prezıdent N.Nazarbaevtyń Qurmet gramotasyn ıelengen kombaınshy jas jigit Mamyrbek Baqtyǵazyuly men búginde maýsym kezinde 100-den asa jannyń basyn biriktirip, jumys kózin taýyp berip otyrǵan ujymnyń arasynda tarıh salǵan soqpaqtar jatqany ras. Jyl saıyn «Úzdik salyq tóleýshi» ataǵyn jeńip alyp kele jatqan seriktestikke mundaı mártebe ózdiginen kelgen joq, árıne.
– Iýbıleınyılyqtar bıznestiń áleýmettik jaýapkershiligin durys túsinip kele jatqan ujym. Aýyldaǵy kómekke zárý, turmysy tómen otbasylaryna, jastary egde tartqan qarııalar men mektep ujymyna únemi qoldaý bildirip kele jatqan Mamyrbek Baqtyǵazyulyna alǵys aıtamyz, – dedi aýyl ákimi Saılaýhan Estemesov. – Ol aýyldaǵy meshit, sport kesheni, qatymhana, meıramhana, naýbaıhana, suıyq maı shyǵaratyn zaýyt, qyrman, mashına-traktor jóndeý sheberhanasy, aýdan ortalyǵyndaǵy dıirmen, – barlyǵynyń jumysyn alǵa bastyryp otyr.
Qazirgi kezde oblys ákimi D.Ahmetovtiń taýarly sút fermalaryn qaıta jańǵyrtý ıdeıasyn qýattap, atalǵan iske bel sheshe kirisken Mamyrbek Kóldeneń aýylyna uzyndyǵy – 120, eni 10 metrdi quraıtyn qorajaı salyp, sıyr saýatyn qurylǵylar satyp aldy. Arnaıy sıyr buzaýlaıtyn jáne saýyn sıyr turatyn qorajaılar qazir óndiriske saqadaı-saı. Sondaı-aq asyl tuqymdy «Sımmental» sıyrlary, Reseıden ákelgen «Altaı», «Rysak» tuqymdy jylqylary, qazaqtyń «Baıys» tuqymdy qara qoılary men «Gıssar» qoılary da osy sharýashylyqta. Baǵýy kelisse qoılardyń ózi 100 keliden et bere alady.
Osynyń bárine azyq kerek ekeni belgili. Kóldeneń aýyly jeri qunarly, shóbi shúıgin jerde ornalasqandyqtan astyq ósirý – seriktestiktiń basty mindetteriniń biri. Bıdaı, arpa, kúnbaǵys sekildi dándi, maıly daqyldardyń ár gektarynan únemi joǵary ónim alýǵa qol jetkizip keledi. – Bıyl 20 mıllıon teńgege osy daqyldardy keptiretin agregat satyp aldyq, – deıdi seriktestik basshysy. – Sol sııaqty kúnbaǵys dánin sebetin «Matarmaks» atty 3 tuqymsepkish, 5 «Belarýs», 3 kombaın aldyq. Budan ózge ózimizdegi «Zarıa» kúnbaǵysyna qosymsha 23 mıllıon teńgege jýyrda ǵana sheteldik «Sanaı», «Kondı», «Trıstan» atty kúnbaǵys tuqymdaryn ákeldik. Sondaı-aq, О́skemen qalasyndaǵy tájirıbe almasý ornynan «Darıa», «Toma» degen bıdaı tuqymdaryn satyp alǵanbyz. Alla qalasa, kóktem shyǵa jerge sińirmekpiz. Jeriń qandaı qunarly, bonıteti joǵary bolǵanymen, tyńaıtqyshsyz is bitpeıdi. Jambyl oblysynan «ammafos»
tyńaıtqyshyn, kúzdik bıdaıǵa Aqtaý qalasyndaǵy «Qazazottan» selıtra alyp jerdi tyńaıtamyz. Bir sózben aıtqanda, básekege qabiletti, jańa zamanǵa laıyq is jasasaq degen oı.
...Bıyl Tarbaǵataı qoınaýyna kóktem keshigip keldi. Dıqan qaýymy men malshylar kúnniń raıyn baqylap jata almaıtyn halyq. Biri ketpen, kúregin alyp, atyz boılap ketse, biri myńǵyrtyp malyn órgizip Barqytbeldiń baýyryn jaılaýda...
Berikhan TAIJIGIT, jýrnalıst
Shyǵys Qazaqstan oblysy, Úrjar aýdany