3-5 shilde kúnderi Tatarstan Prezıdenti Rýstam Mınnıhanov jumys saparymen Qazaqstanda boldy. Osy jumys sapary aıasynda Qazaqstan men Tatarstannyń 200-den astam isker toptary ókilderiniń bıznes-forýmy ótkizildi, dep habarlady Qazaqstan Respýblıkasy Premer-Mınıstriniń baspasóz qyzmeti.
Bıznes-forýmda sóz sóılegen Qazaqstan Respýblıkasy Premer-Mınıstriniń birinshi orynbasary Asqar Mamın eki el arasyndaǵy taýar aınalymynyń áleýetin AQSh-tyń 1 mıllıard dollaryna jetkizý múmkindigi bar ekendigin atap ótti. «Memleket basshysy Tatarstanǵa bıylǵy maýsym aıyndaǵy sapary barysynda osyndaı tapsyrma berdi», dedi A.Mamın.
2017 jyly Qazaqstan men Tatarstan arasyndaǵy saýda aınalymy 700 mln AQSh dollaryna jýyqtady. Bul 2016 jylmen salystyrǵanda 1,7 esege (425,3 mln AQSh dollary) kóp.
Forým aıasynda yntymaqtastyqtyń munaı hımııasy, mashına jasaý, qorǵanys ónerkásibi, kólik, ınnovasııa salalaryndaǵy bolashaǵy talqylandy. Bıznes-forým qorytyndysy boıynsha taraptar birlesken jobalardy júzege asyrýdyń Jol kartasyn jasaqtaýǵa kelisti.
Onyń syrtynda, Memlekettik basqarý akademııasy men Qazan federaldyq ýnıversıteti, Qazaqstannyń Syrtqy saýda palatasy men Tatarstan saýda-ónerkásip palatasy, «Astana Hub» IT startap halyqaralyq tehnoparki men «IT-park» joǵary tehnologııalar salasyndaǵy tehnoparki, «Semeı avtoqurastyrý zaýyty» JShS men «RarıTEK jóndeý-mehanıkalyq zaýyty» AAQ arasynda yntymaqtastyq týraly qujattarǵa qol qoıylǵan bolatyn.
Tatarstan Prezıdenti Astanaǵa jumys sapary barysynda «Astana» halyqaralyq qarjy ortalyǵy men Islam qarjy uıymy sammıtine qatysty.