Bas prokýror Qaırat Qojamjarov qylmystyq saıasatty gýmanızasııalaý sharalary týraly málimdedi.
Onyń aıtýynsha, Memleket basshysynyń Joldaýy aıasynda qylmystyq saıasatty gýmanızasııalaý jumysy kúsheıdi. Osy oraıda arnaıy zań jobasy da daıarlandy. Oǵan sáıkes, 260 qylmys boıynsha qoǵamdyq jumys jáne bas bostandyǵyn shekteý sııaqty jaza engiziledi. Al 36 qylmys boıynsha aıyppuldyń kólemi tómendeıdi. Budan bólek, bas bostandyǵynan aıyrý merzimi qysqaratyn bolady.
«Sosyn asa aýyr qylmystar boıynsha jazaǵa tartý merzimi 5 jyl dep belgilenip otyr. Osynyń negizinde 5 myńǵa jýyq sottalǵan adamdy bosatýǵa bolady. Memleket basshysy ol zańǵa qol qoıdy», - dedi Q.Qojamjarov búgingi alqa májiliste.
Aıta keteıik, alqa májilisi kezinde Bas prokýratýra janyndaǵy Quqyq qorǵaý organdary akademııasynyń rektory Erǵalı Merzadınov atalǵan oqý ornynyń kemshin tustaryn jarııalady. Onyń aıtýynsha, akademııa qyzmetkerleriniń kásibı daıyndyǵyn jan-jaqty tekserip shyǵý qajet. Sebebi mamandardyń aýysýy jıilep ketti. Úsh jyldyń ishinde atalǵan kórsetkish 60 prosentti qurady. «Eńbek tártibi osal. Árbir ekinshi qyzmetker «bolnıchnyıda» júrdi. Al keıbir qyzmetkerler bir jylda eki ret emes, 8-10 ret «aýyryp» shyǵady. Bunyń barlyǵy kúndelikti nársege aınaldy. Sosyn akademııada úsh jyl istese, kiretin esikti de bilmeıtin qyzmetkerler bar», - dep atap kórsetti E.Merzadınov.