16 shildeden bastap aptasyna 4 ret (dúısenbi, sársenbi, juma, senbi kúnderi) «Máskeý-Qyzylorda-Máskeý» jańa áýe baǵyty óz jumysyn bastaıdy. Áýe tasymaly «Aeroflot» kompanııasynyń A-320/321 «Eırbas», «Boeing-737» ushaǵy arqyly júrgiziledi.
Sonymen qatar, «Baıqońyr-Qyzylorda (áýejaı)» transferi daıyndalady.
«Osy jyldyń mamyr aıynda «Qorqyt ata» áýejaıynyń qyzmetkerleri «Avıasııalyq aeroflot mektebiniń» mamandarynan arnaıy oqýdan ótip, A320/321 áýe kemesiniń tehnıkalyq qyzmet kórsetý daıarlyǵyn tekserýden ótkizdi.
Sonymen qatar, Qyzylorda oblysy Jolaýshylar kóligi jáne avtomobıl joldary basqarmasy Baıqońyr qalasynyń ákimshiligimen áýe baǵytynyń jumysyn jandandyrý maqsatynda áýejaıǵa baratyn avtobýstar máselesi týraly jumystardy atqardy. «Aeroflot» kompanııasy arqyly ushý basqa áýe kompanııalarymen salystyrǵanda birshama arzan», - dedi oblys ákiminiń orynbasary Serik Súleımenov.
Aıta keteıik, búgingi kúni alǵashqy reıske bılettiń kóp bóligi satylǵan.
Keste boıynsha ushaqtyń kelý ýaqyty – 06:10, ushý ýaqyty jergilikti ýaqytpen – 07:20. Satyp alǵan ýaqytyna qaraı bıznes-klass bıletteriniń baǵasy – 167 000-nan bastalsa, ekonom-klass bıletteri 26000-nan bastalady.