Almatyda ótken sý resýrstaryn basqarý jónindegi salaaralyq yntymaqtastyqty nyǵaıtý men damytýǵa baılanysty Aımaqtyq keńeste Ortalyq Azııadaǵy sý máselesi talqylandy.
Sý tapshylyǵy sońǵy otyz jyl kóleminde Ortalyq Azııa aımaǵyn alańdatyp otyrǵan kókeıkesti másele. Sala mamandary sý máselesiniń jyldan-jylǵa ushyǵyp otyrǵan sebep-saldaryn múddeli taraptar qyzmetindegi úılesimsizdikter men sý resýrstaryn basqarýdaǵy áreketterdiń jetkiliksizdigimen túsindiredi.
Almatydaǵy Aımaqtyq keńeste bas qosqan BUU, EQYU, EEK halyqaralyq uıymdarynyń, Qyrǵyzstan, Reseı, Qytaı, Mońǵolııa, Tájistan, Túrkimenstan jáne О́zbekstannyń resmı ókilderi sý resýrstary boıynsha aımaqaralyq yntymaqtastyq máselesin talqylap, Halyqaralyq sýdy baǵalaý ortalyǵynyń baǵdaralamasyna baılanysty usynystaryn ortaǵa saldy. Ortalyq Azııa men aımaqtaǵy elderdiń sý qorlarynyń tıimdiligin arttyrý, 2030 jylǵa deıin sý paıdalanýǵa baılanysty ózara tájirıbe almasý keńes barysynda negizigi másele retinde qaraldy.
Transshekaralyq sý yntymaqtastyǵy búginde adamzattyń órkendep, jer álemniń gúldenýi jolyndaǵy basty qadam. Salada kelisimderge qol jetkizý álemdik qaqtyǵystardyń aldyn alyp, beıbitshilik pen turaqtylyqty qamtamasyz etýge múmkindik beredi.
Halyqaralyq sýdy baǵalaý ortalyǵyn (HSBO) Qazaqstanda ashý týraly elimiz Úkimeti men EEK arasyndaǵy Memorandýmǵa 2017 jyly qol qoıylǵan bolatyn. Halyqaralyq sýdy baǵalaý ortalyǵy transshekaralyq aǵyn sýlar men halyqaralyq kólderdi qorǵaý jáne paıdalaný týraly Konvensııasynyń enshiles birlesken organy bolyp tabylady.
Elvıra Serikqyzy,
«Egemen Qazaqstan»
ALMATY