Almatydaǵy jurt kóp jınalatyn ǵımarattardyń birinde turǵan myna bir asyqtan órilgen arǵymaqtyń janynan ótken jan eleń etpeı ketpeıdi. Ary-beri aǵylǵan halyqtyń osynaý tańǵajaıyp óner týyndysyna telmire kóz tastaǵanyn, bolmasa qasyna tura qalyp sýretke túsip jatqanyn jıi baıqaısyz.
Belgili qolóner sheberleri Nurlan Ádilhan men Nurlan Ábishevtiń qoltańbasynan týǵan biregeı týyndy álemdegi teńdesi joq óner muralarynyń sanatyna kirgen. Jiptikteı ári naqyshty jasalǵan ásem músin birden kóz baýraıdy. Kádimgi asyqtan da mundaı keremet músin somdaýǵa bolady eken ǵoı dep tańyrqaısyz. Tańyrqap qana qoımaı, sheberlik asqan tózimdilik pen eptilikti qajet etetin aıryqsha óner ekenin moıyndaýyńyzǵa týra keledi.
Elimizdiń ár aımaǵynan ákelingen segiz myń asyqtan jasalǵan jylqy músini táýelsizdikti, birlikti, sáttilikti beıneleıdi. Alǵa qaraı atyrynǵan jas tulpardyń sulý tulǵasy mol qýattyń, jiger jalynnyń, erkindiktiń beınesin kóz aldyńyzǵa ákeledi.
«Qazaqta asyǵyń alshysynan tússin degen aq tilek bar. Osyny eskerip, asyqty alshysynan turǵyzyp, ońqaıyn sol qaptalǵa, solaqaıyn oń qaptalǵa ornalastyrdyq. «Alshy turý» – úlken sáttiliktiń belgisi. Bul týyndymyzdy egemen elimizdiń árbir jasy erkindikti sezinip ósse degen nıetpen jasadyq», deıdi avtorlar.
Halqymyz Qambar ata balasy sanalǵan jylqy malyn qashannan da qadir tutqan. Al asyq bolsa balany utqyrlyqqa, dáldikke baýlıtyn ulttyq óner. Sońǵy jyldary otandyq qolóner sheberleriniń ult murasynan syr shertetin túrli deńgeıdegi buıymdar jasaýǵa den qoıǵany kóńil qýantady. Biz sóz etip otyrǵan tulpar turpatyn tanytatyn tamasha músin men qorshaǵan orta arasyndaǵy baılanys ózara jarasym taýyp turǵandaı kórinedi.
Asyqtan órilgen arǵymaq músin...
Arman OKTIаBR,
«Egemen Qazaqstan»
ALMATY