Metallýrgter kúni bıyl О́skemende ózgeshe atap ótildi. Ataýly dataǵa oraı oblys ortalyǵynda birqatar is-sharalar uıymdastyryldy.
13 shilde kúni «Qazsınk» kompanııasyna qarasty О́skemen metallýrgııalyq kesheniniń óndiristik alańynda Dańq alleıasy saltanatty túrde ashyldy. О́ńirdegi iri óndiris ornynyń ákimshilik máseleler jónindegi atqarýshy dırektory Andreı Lazarev Dańq alleıasynyń ashylýy qarapaıym jumysshylarǵa kórsetilgen qurmet ekendigin, munda osynda eren eńbegimen kózge túsken júzdegen qyzmetkerlerdiń sýretteri ilingenin aıtady. «Dańq alleıasyna meniń de sýretim qoıylǵan eken. Endi meniń sýretimdi mekemeniń barlyq eńbekkerleri men qonaqtary kóretin bolady. Jumysymdy marapat alý úshin emes, óz isimdi jaqsy kórgendikten isteımin. Degenmen kompanııa basshylyǵyna az-kem eńbegimizdi elep-eskergenderi úshin alǵys aıtamyn», - deıdi О́skemen metallýrgııalyq kesheniniń saraptaý jáne josparlaý qyzmetiniń basshysy Amangeldi Tynybaev.
Sonymen qatar osy kúni «Qazsınk» kompanııasy uıymdastyrǵan «Izgi júrek» syılyǵy О́skemendegi «Vostok» stadıonynda saltanatty túrde tabys etildi. Bul syılyq óz ómirin qaterge tigip, qarapaıym adamdardy qutqarǵan qarapaıym shyǵysqazaqstandyq qaısar azamattardy anyqtaý maqsatynda qolǵa alynǵan-dy. Sonymen, halyqtyń daýys berýi nátıjesinde Ertistiń muzdy sýynan eki jastaǵy balasyn qutqarý úshin sýǵa sekirgen anasyna járdemdesken О́skemendegi Tótenshe jaǵdaı bóliminiń órt mashınasynyń júrgizýshisi Vıtalıı Baqtybaev, órtke oranǵan úıge balkon arqyly kirip zeınetkerge kómek qolyn sozǵan elektromonter Pavel Kachesov, qaqaǵan qańtar aıynda sý basqan úıden eki bala men zeınetkerdi qaýipsiz jerge jetkizgen Glýbokoe aýdanynyń Praporshıkova aýylynyń ýchaskelik ınspektory Rýslan Orazametov, órt shalǵan úıden kishkene balany alyp shyqqan «Qazsınk» qyzmetkeri Aleksandr Popov 500 myń teńgeniń aqshalaı syılyǵyna ıe boldy. «Maǵan «syılyqqa úmitkerlerdiń qatarynda siz de barsyz» dep habarlasqanda senbegenim ras. Basyna qaýip tóngen turǵyndarǵa kómektesken azamattardyń barlyǵy qandaı marapatqa da laıyq dep esepteımin. Osyndaı taǵylymdy sharany uıymdastyrǵan jandarǵa rızashylyǵymdy bildiremin», - deıdi «Izgi júrek» syılyǵynyń jeńimpazdarynyń biri Vıtalıı Baqtybaev.
Oblys ortalyǵynda keń kólemde toılanǵan Mettalýrgter kúni merekesi «Vostok» stadıonynda tanymal telejúrgizýshi Maıa Bekbaeva men akter Músilim Táýekeldiń júrgizýshiligimen, ánshi Álisher Kárimov, reseılik «Vısokosnyı god» toby jáne Sharıp Ýmhanovtyń qatysýymen ótken konsertpen túıindeldi.
Azamat QASYM,
«Egemen Qazaqstan»
О́SKEMEN