Bul úshin dıqandar Fedorov aýdanyndaǵy «Troıan» jaýapkershiligi shekteýli seriktestiginiń egis alqabyna jınaldy.
Onda oblys ákiminiń orynbasary Ǵaýez Nurmuhambetovtyń basqarýymen aýyl sharýashylyǵy keńesi ótti. Aldymen dıqandar sharýashylyqtyń tehnıkasyn aralap kórdi. Dıqandardyń munda bas qosýy tegin emes edi. О́ıtkeni ol egin sharýashylyǵyn sıfrlandyrý úshin tańdalyp alynǵan respýblıkadaǵy 9 qanatqaqty sharýashylyqtyń biri bolatyn. Sıfrlandyrý baǵdarlamasy boıynsha tehnıka sapaly bolýy tıis. Sharýashylyq jetekshisi Iýrıı Malyshko sońǵy jyldarǵy jetistikter men ózgerister týraly aıtyp berdi. Sharýashylyqtyń 7 myń gektar egis alqaby bar. Qazir egin shyǵymy jaqsy. Egin alqabynyń 30 paıyzy maıly jáne burshaq tuqymdas daqylǵa aýystyryldy.
«Naryqty zerttep otyrýymyz kerek. Bıdaı alqabyn azaıtyp kelemiz. Maıly, burshaq daqyldardyń ótimi joǵary. Zyǵyrdyń sabanyna deıin óńdep,satýdy úırendik. Túrli jumystarǵa paıdalanylatyn kendirdiń tonnasyn 160 myń teńgeden satamyz, onyń ózindik quny 60 myń teńgeden aspaıdy» deıdi Iýrıı Mıhaılovıch.
«Alqap kúnine» Astana qalasyndaǵy Agrotehnıkalyq ýnıversıtetiniń ǵalymdary da qatysty. Olar egin sharýashylyǵyndaǵy sıfrlandyrý boıynsha tańdalǵan qanatqaqty sharýashylyqtarmen jumys isteıdi.
«Biz sıfrlandyrý tehnologııasyn engizgen sharýashylyqtardyń tabysy arqyly onyń tıimdiligin anyqtaımyz.Gerbısıd, tyńaıtqysh, tehnıka qoldanýdyń barlyǵyn da eski jolmen emes, sıfrlandyrý tehnologııasy arqyly júrgizgende nátıje tipti basqa bolady.Muny aldaǵy ýaqytta keńeıtemiz, ıaǵnı sıfrlandyrý tehnologııasyn egin sharýashylyǵyna engizetin sharýashylyqtar qatary kóbeıe beredi» deıdi S.Seıfýllın atyndaǵy Qazaq agrotehnıkalyq ýnıversıtetiniń prorektory Qaırat Aıtýǵanov.
Názıra Járimbet
«Egemen Qazaqstan»
Qostanaı