О́tken apta fýtboldan ÝEFA Chempıondar lıgasy men Eýropa lıgasynyń ekinshi irikteý kezeńi aıasyndaǵy alǵashqy oıyndar ótti. Aldaǵy sársenbi jáne beısenbi kúnderi qarymta matchtar oınalady. El chempıony «Astana» syrt alańda Danııanyń «Mıdtıýlland» komandasymen kúsh synassa, Almatynyń «Qaıraty» Nıderlandynyń azýly klýby «AZ» (Alkmaar) klýbymen, Qostanaıdyń «Tobyly» Armenııanyń «Pıýnık» ujymymen kezdesedi.
Qatarynan altynshy jyl Eýrokýbok básekelerine qatysyp jatqan elordanyń «Astana» komandasy Chempıondar lıgasynyń ekinshi irikteý kezeńi aıasynda óz alańynda Danııanyń «Mıdtıýlland» komandasyn qabyldap, 2:1 esebimen basym tústi. Kezdesý qazaqstandyq mánerlep syrǵanaýshy, Sochı Olımpıadasynyń júldegeri Denıs Tenniń mezgilsiz qaıtys bolýyna baılanysty 1 mınýttyq eske alýmen bastaldy. Jazǵy transfer kezeńinde quramyn birneshe fýtbolshylarmen kúsheıtken «Astana» bul matchqa tas-túıin daıyn edi. Tipti oıynnyń alǵashqy mınýtynan bastap alańǵa Ázerbaıjannyń «Karabah» komandasynan aýysyp kelgen brazılııalyq fýtbolshy Pedro Enrıkeni shyǵardy. Bul Pedronyń «Astana» sapyndaǵy alǵashqy oıyny bolǵanymen, jankúıerlerge jaqsy oıyn órnegimen kózge tústi.
«Astana Arena» stadıonynda ótken eki komanda arasyndaǵy alǵashqy oıyn Laslo Klıaınhaıslerdiń benefısine aınaldy desek artyq aıtqandyq emes. О́ıtkeni búkil oıyndy uıymdastyrǵan dál osy Laslo edi. Bylaısha aıtqanda, jasyl alańdaǵy barlyq «qara jumysty» tap osy vengrııalyq jartylaı qorǵaýshy atqardy. Sóıtip júrip qarsylas qaqpasyna eki birdeı tamasha gol soǵyp, komandasyna mańyzdy jeńis syılady. Birinshi taımnyń 31 jáne 94-mınýtynda Klıaınhaıslerdiń eki golyna qonaqtardan Gýstav Vıkheım oıynnyń 51-mınýtynda bir golmen jaýap qatty. Qorytyndy esep – 2:1. Bul nátıje syrt alańdaǵy qarymta kezdesý aldynda «Astana» úshin óte qaýipti esep. О́ıtkeni qonaqtardyń syrt alańda soqqan bir goly eki gol soqqanmen para-par. Endi «Astana» qarymta matchta qorǵanysqa mán berip, gol ótkizbeýdiń amalyn jasaý kerek. Sondaı-aq teń esep te «Astana» úshin qanaǵattanarlyq nátıje. Eki komanda arasyndaǵy qarymta kezdesý 1 tamyz kúni Danııanyń Hernıng qalasynda ótedi.
Eýropa lıgasynda baq synap jatqan Almatynyń «Qaırat» komandasy «Ortalyq» stadıonda «AZ» (Alkmaar) komandasymen kezdesip, Nıderlandy klýby Qazaqstannan ekinshi ret elderine jeńilispen qaıtty. Bulaı aıtýymyzdyń sebebi, «AZ» komandasy buǵan deıin bizdiń klýbtarmen birneshe ret sheberlik baıqasqan. Naqtyraq aıtar bolsaq, 2010 jylǵy Eýropa lıgasynda «Aqtóbe» komandasymen oınap, 2:1 esebimen jeńilip qalǵan. Sol oıynda Murat Tileshov eki gol soqqan edi. Araǵa 4 jyl salyp «AZ» fýtbolshylary Qaraǵandynyń «Shahterine» tap kelip, 1:1 esebimen teń tarqasýǵa májbúr bolǵan. Bul kezdesýde Andreı Fınonchenko mergendigimen kózge túsken bolatyn. Endi, mine, Qazaqstanǵa kelgen úshinshi saparynda da jeńis bylaı tursyn, qaqpamyzǵa gol soǵa almaı ketti.
Kezdesýdiń 12-mınýtynda jazǵy transferde «Aqjaıyqtan» «Qaıratqa» aýysqan jartylaı qorǵaýshy Aderınsola Eseola mergendigimen kózge túsip, komandasyn esepte alǵa shyǵardy. Birinshi taımda esep ózgerissiz qaldy. Matchtyń ekinshi bóligin «Qaırat» belsendi bastady. Oıynnyń 50-mınýtynda Aderınsola Eseola esepti eselep, óziniń matchtaǵy ekinshi golyn saldy. Oıynnyń qalǵan bóliginde «Qaırat» qorǵanysqa kóbirek kóńil bólip, esepti ustap turýǵa tyrysty. «AZ» komandasy esepti qysqartýǵa qansha tyrysqanymen, «Qaırat» komandasyna gol soǵý buıyrmady. Eki komanda arasyndaǵy qarymta kezdesý 2 tamyz kúni Nıderlandyda ótedi.
«Qaırat» búginge deıin Eýrokýbok oıyndarynda 29 oıyn ótkizip, birshama tájirıbe jınaqtady. 15 kezdesýde jeńiske jetse, 5 matchta teń túsip, 9 oıynda jeńilgen. Degenmen, 2002 jyldan beri Eýrododa oıyndarynda synǵa túskenimen, áli birde-bir ret toptyq kezeńge shyǵa almaı júr. Buǵan deıin Almatynyń komandasy 2015-2016 jyldary Eýropa lıgasynyń pleı-off kezeńinde Fransııanyń «Bordo» komandasynan jeńilip, toptyq kezeńnen qaǵylǵan edi. Ázirshe bul «Qaırattyń» Eýrokýbogtaǵy eń úzdik nátıjesi. Bıyl olqylyqtyń ornyn toltyrýǵa tolyq múmkindikteri bar.
Eýropa lıgasy da oıda-joqta top ete qalǵan Qostanaıdyń «Tobyl» komandasy da táp-táýir, jınaqy oıyn kórsetip júr. Negizi bul synda áý basta byltyr el chempıonatynda úshinshi oryn alǵan shymkenttiń «Ordabasy» komandasy qatysýy kerek bolǵan. Alaıda Qazaqstan fýtbol federasııasynyń málimeti boıynsha, «Ordabasy» ÝEFA týrnırlerine qatysý úshin qarjylyq feır-pleı erejesin saqtamaǵan. Sóıtip joldama «Ordabasydan» keıingi oryndy ıelengen «Tobyl» komandasyna buıyrdy.
Vladımır Nıkıtenko da jazǵy transfer maýsymynda komandasyn birshama kúsheıtti. «Pıýnıkke» qarsy ótken kezdesýde Nıkıtenko argentınalyq legıoner Hýan Leskano men reseılik Marat Bystrovty birinshi mınýttan alańǵa shyǵardy. Eki oıynshy da ózderiniń sheberlikterin kórsetip, komandasynyń jeńisine mańyzdy kómekterin tıgizdi. Sonymen qatar «Tobyl» sapynda «Qaırattan» aýysyp kelgen tájirıbeli fýtbolshylar Aslan Darabaev pen Baýyrjan Turysbek bar. Odan bólek komandada Ońtústik Afrıka Respýblıkasynan kelgen Fernander Kassaı, lıtvalyq Artýras Jýlpa sııaqty myqty legıonerler bar.
Qostanaıda ótken alǵashqy kezdesýde úsh gol soǵylǵanymen, komandalar alǵashqy taımda bir-biriniń qaqpa kiltin taba almady. Al ekinshi taımnyń 49-mınýtynda Maksım Fedın esepti ashsa, match aıaqtalýyna 10 mınýt qalǵanda komanda kapıtany Azat Nurǵalıev esepti 2:0-ge jetkizdi. Degenmen, «Tobyl» klýby match sońyna deıin eseptegi basymdyqty saqtap qala almady. 90-mınýtta Armenııa quramasynyń shabýylshysy Rýslan Korıan esepti qysqartyp, qarymta oıyn aldynda komandasyna úmit otyn syılady. Endi eki ujym 2 tamyz kúni Armenııada kezdesedi.
Álı BITО́RE,
«Egemen Qazaqstan»