Qazaqstandyq zaǵıp jáne nashar kóretin azamattardyń «Blind Race Astana – Paris» qurlyqaralyq velomarafony bastaldy. Velomarafonnyń bir ereksheligi, 16 adamnan quralǵan top 6000 shaqyrymdy júrip ótýi kerek. Olardyń altaýy zaǵıp jáne nashar kóretin jandar.
Qatysýshylar 6 myń shaqyrym joldy júrip ótip, 6 eldiń 30 qalasyn qamtıdy. Onyń ishinde Reseı, Belarýs, Polsha, Germanııa sekildi elder bar. Jobany tanystyrý, dostyq qarym-qatynasty nyǵaıtý jáne tájirıbe almasý maqsatynda 11 úlken qalada qoǵam belsendilerimen, erekshe qajettiligi bar adamdarmen, sportshylarmen jáne BAQ ókilderimen kezdesý ótkizý josparlanǵan. Velosherýdiń negizgi maqsaty – salamatty ómir saltyn nasıhattaý, velosıpedti ekologııalyq taza kólik túri retinde dáripteý, áleýmettik jáne ekotýrızmdi damytý. Sonymen qatar paralımpııalyq sport túri retinde múgedek jandar arasynda bul sport túriniń damýyna yqpal etý, jastardy patrıottyqqa tárbıeleý.
«2016 jyly múgedektigi bar azamattarǵa arnalǵan sporttyq jarysqa qatystym, sharanyń uıymdastyrylý deńgeıi óte tómen boldy, eshqandaı jaǵdaı jasalmaǵan, qazir bul sport túri bir izge qoıylǵan. Sol kezde men ózimizden bastamasaq bolmaıtynyn túsindim. Mine, búgingi velomarafon sonyń jemisi dep aıtqym keledi. Iаǵnı maqsatymyz – zaǵıp jáne nashar kóretin jandar da qoǵamnyń múshesi ekenin, bizdiń de ózdigimizden júrip-turyp, qoǵamǵa paıdamyzdy tıgize alatynymyzdy dáleldeý. Sonymen qatar negizgi kózdegenimiz – velosport pen parasportty nasıhattaý. Mundaı joba Qazaqstanda tuńǵysh ret uıymdastyrylyp otyr», deıdi «Shekarasyz sport» jobasynyń basshysy, «Astana – Parıj» velosherýiniń kapıtany Bahtııar Bazarbekov.
Velomarafon Astana ákimdigi, «Nur Otan» partııasy, Qoǵamdyq damý mınıstrligi, «A.Vınokýrov atyndaǵy sportty damytý jáne qoldaý» qory, paralımpııalyq komıtet, Qazaqstan Respýblıkasy sport velosıpedi federasııasy jáne «El tiregi» shaǵyn jáne orta bıznes qaýymdastyǵynyń qoldaýymen uıymdastyrylyp otyr.
«Blind Race Astana – Paris» velomarafonyn 4 tamyzda Astanadaǵy «Qazaq eli» monýmentiniń aldynda resmı túrde bastaldy. Sporttyq sharany 2018 jyldyń qyrkúıek aıynyń ortasynda velojarystyń otany sanalatyn Fransııanyń Parıj qalasynda aıaqtaý josparlanýda. Velomarafon Qazaqstan aýmaǵynda Astana, Atbasar, Áýlıkól jáne Qostanaı arqyly ótip, ári qaraı Reseı tasjoldarymen Parıjge deıin jalǵasady.
Álı BITО́RE, «Egemen Qazaqstan»