Baqytjan Saǵyntaev Úkimet otyrysynda otyn tapshylyǵy máselesin talqylady, dep habarlaıdy QR Premer-Mınıstrdiń baspasóz qyzmeti.
Qabyldanǵan sharalar qorytyndylary
Elorda men óńirlerde týyndaǵan, kómir baǵasynyń kúrt ósýine ákelgen jaǵdaı monopolııaǵa qarsy kúres komıtetiniń basa nazaryna ilindi.
QR UEM Tabıǵı monopolııalardy retteý komıtetinen habarlaǵandaı, 2017/2018 jylý maýsymynda kómir tapshylyǵy men onyń baǵasynyń ósýi faktileri boıynsha úsh kómir óndiretin kompanııa men 96 bólshek-kóterme jetkizýshilerge qatysty básekelestikti qorǵaý salasyndaǵy zańnamany buzǵandary úshin 21 tergeý bastalǵan.
Qazirgi tańda, 20 tergeý aıaqtaldy, onyń ishinde 12 jaǵdaıda 50 sýbektiniń buzýshylyqqa oryn bergeni rastaldy:
ShQO-da kómir naryǵynda kóterme jetkizýshilerdiń ekonomıkalyq is-áreketin úılestirýmen aınalysqan «Qarajyra» AQ kómir óndirýshige qatysty tergeý.
On óńirde (Astanada, Aqmola, Aqtóbe, Almaty, ShQO, Jambyl, BQO, Qaraǵandy, SQO, Túrkistan oblystarynda) baǵany ósirýge baılanysty kelisilgen is-áreketterdi jasaýyna nemese kartelder jasasýǵa kúdikti retinde 49 kóterme-bólshek kómir jetkizýshilerge qatysty 11 tergeý.
Monopolııalyq kiristi eskerýmen ákimshilik aıyppuldyń jalpy somasy 299 mln teńgeni qurady, qazirgi kezde onyń 47,4 mln teńgesi tólendi. Qalǵan aıyppul somasyna qatysty ákimshilik ister sottarda qaralyp jatyr.
Komıtette aqparattandyrǵandaı, saýda-sattyqtarda kartel jasasý boıynsha Qostanaı oblysynda tórt kóterme jetkizýshige qatysty bir tergeý isi aıaqtalyp qaldy.
О́ndirý ótken jylǵydan kóp
Energetıka mınıstrliginiń málimetinshe, jedel derekter boıynsha kómir óndiretin kásiporyndar a.j. jeti aıynyń ishinde 60 mln t kómir óndirgen, bul ótken jylǵy osyndaı kezeńge shaqqanda 103,9% (59,7 mln t).
Elektr stansııalaryna 32,4 mln t kómir tıeldi, bul ótken jyldyń osy kezeńine shaqqanda 102,5% (31,6 mln t). Turǵyndardyń kommýnaldyq-turmystyq qajettilikteri úshin 5,44 mln t kómir tıeldi – 2017 j. osy kezeńge shaqqanda 100% (5,3 mln t). Vedomstvodan atap ótkendeı, bul kezeńde 15,5 mln t kómir eksporttaldy.
Energetıka mınıstrliginde ótken jylý maýsymynda turǵyndar úshin kómir jetkizýde irkilister bolǵanyn moıyndaıdy.
«Bul negizgi eki faktorǵa baılanysty: jergilikti atqarýshy organdar tarapynan daıyndyqtyń bolmaýy jáne adal emes kómir jetkizýshilerdiń úılestirilmegen is-áreketi», dep naqtylady EM.