Aqtaý qalasynda Kaspıı jaǵalaýy memleketteri Syrtqy ister mınıstrleriniń orynbasarlary deńgeıindegi Kaspıı teńiziniń quqyqtyq mártebesi týraly konvensııany ázirleý boıynsha Arnaıy jumys tobynyń qorytyndy 52-shi otyrysy ótti, dep habarlaıdy QR SIM baspasóz qyzmeti.
Kelissózderge Ázerbaıjan Respýblıkasy (jetekshisi – H.A.Halafov), Iran Islam Respýblıkasy (jetekshisi – R. Nazar Aharı), Qazaqstan Respýblıkasy (jetekshisi – Z.A.Amanjolova), Reseı Federasııasy (jetekshisi – I.B.Bratchıkov) jáne Túrikmenstannyń (jetekshisi – M.G.Atadjanov) delegasııalary qatysty.
AJT otyrysynda taraptar Besinshi Kaspıı sammıtiniń qujattaryn ázirleý boıynsha jumystyń qorytyndysyn shyǵardy, sondaı-aq Kaspıı jaǵalaýy memleketteriniń syrtqy ister mınıstrleri keńesiniń kún tártibin talqylady jáne kelistirdi.
Kaspıı teńiziniń quqyqtyq mártebesi týraly konvensııany ázirleý boıynsha kelissózderdiń aıaqtalýyna oraı, taraptar birlesken uzaq merzimdi jumys nátıjelerin zor qanaǵatpen atap ótti.
Delegasııalar oryn alǵan kelissózderdiń nátıjelerine oń baǵa berip, qorytyndy kezdesýdi joǵary deńgeıde uıymdastyrǵany úshin Qazaqstan Respýblıkasyna óz rızashylyǵyn bildirdi.