«Zeren» demalys ortalyǵynda «Digital-urpaq» respýblıkalyq jastardyń jazǵy bilim lageri ashyldy. Bilim lageri Memleket basshysy Nursultan Nazarbaevtyń bes bastamasyn talqylaýdyń, iske asyrýdyń alańy bolmaq.
Alǵa qoıǵan maqsat-murat orasan zor. Eń bastysy, búgingi jastarǵa memleketimiz ben qoǵamymyzda bolyp jatqan oń ózgeristerdiń qaınaǵan ortasynan tabylyp, bolashaq ıeleri ózderi ekendigin uǵyndyrý qajet. Alǵa súıreıtin alapat kúsh te solar.
Jıynǵa qatysqan Qoǵamdyq damý mınıstri Darhan Qaletaev pen Aqparat jáne kommýnıkasııalar vıse-mınıstri Nurgúl Maýberlınovanyń ashylý saltanatyndaǵy lebizinen osyndaı asqaraly oı órildi.
Jáne aldaǵy ýaqytta dál búgingideı jastar jıyndaryn ótkizýdi, sóıtip, jastar arasyndaǵy tolaıym tabystardy nasıhattap, kil júırikti ózge zamandastaryna úlgi etý, olardyń aqyl-keńesterin, tájirıbelerin taratýdy dástúrge aınaldyrý qajet degen oryndy usynysqa Aqmola oblysynyń ákimi Málik Myrzalın qoldaý kórsetip, ár jyl saıyn Zerendi baýraıy jastar zerdesiniń ustahanasyna aınalatynyn atap ótti.
«Kazkontent» aksıonerlik qoǵamynyń tóraǵasy Evgenıı Kochetov ta jasampaz bolashaqtyń ıeleri qandaı bolý kerektigin qolmen qoıǵandaı etip táptishtep aıtyp berdi.
Jigerleri jalyn atqan jastardyń boı túzeıtin, oı túzeıtin temirqazyq-nysanalary bolýy shart. Bir jaqsy jeri, búgingi jıynǵa ondaı jastar da kóptep qatysyp otyr eken. Birneshe jobalardyń, jańashyl ıdeıalar avtorlarynyń esimderi atalyp, qol jetkizgen tabystary ónege ózegine aınaldy. Aldaǵy kúnderi olar jıynǵa qatysýshy jastarmen egjeı-tegjeıli pikir almasyp, baǵyt-baǵdar beredi.
Al, úzdik jobalarǵa jıynǵa uıytqy bolyp otyrǵan mınıstrlikter tarapynan qoldaý kórsetiledi. Búgingi bas qosýdyń utymdy tusy da osy. Aqyl-oı, qabilet-qarymdarynyń arqasynda qazirdiń ózinde birshama tabystarǵa qol jetkizgen daryndy jastar ózderiniń qatarlaryn tolyqtyra túspek. Aınalyp kelgende bul – máńgilik eldiń kóksegen muratyn mándi etetin umtylys.
Memleketimiz ben qoǵamymyzdyń kóptegen salalarynda jańǵyrý júrip jatyr. Jas jiger mol bilimmen astasqanda ǵana básekege qabiletti bolatynymyz anyq. Búgingi kúni biz damyǵan eldermen boı talastyrý úshin bilimdi ult qatarynan tabylýy kerek ekenin túsindik. Mine, osy arada ıntellektýaldyq qabileti zor, belsendi de jigerli jastarǵa senim artylady.
Jastardyń jazǵy bilim lagerindegi jumys ústimizdegi jyldyń tamyz aıynyń 12-i men 26-y aralyǵynda ótkiziledi dep josparlanýda. Jumys úsh taqyryp boıynsha uıymdastyrylmaq. Aıtalyq, birinshi aýysym birneshe taqyrypty qamtıtyn bolady. Onyń ishinde eń basty taqyryp «Digital-urpaq» bolsa, ekinshi aýysym «Jańǵyrý trendteri», úshinshi aýysym «Bıznes sıqyry» dep atalady.
Lagerdiń qatysýshylary elimizdiń ár qıyryndaǵy jastar uıymdarynyń kóshbasshylarymen jáne isin dóńgeletip otyrǵan jas tolqyn arasynan shyqqan kásipkerlermen kezdesedi. Onyń ústine «Qazaqstannyń 100 jańa esimi» jobasynyń qatysýshylary da bul jumystan tys qalmaıdy. Ár aýysymda júz adamnan qamtylmaq.
Aldaǵy mindet – jastar saıasatyn jetildirip, jańa tehnologııalardy oqyp-úırený, tájirıbe almasý bolyp otyr. Osy oraıdaǵy tıimdi tetikterdi jastardyń áleýetin damytýǵa jumyldyrý kózdelýde. Semınarlar men trenıngter ótkizilip, taqyryptyq jobalar ázirlenip, ıdeıalardy irikteý uıymdastyrylmaq.
Baıqal BAIÁDIL,
«Egemen Qazaqstan»
Aqmola oblysy
Zerendi aýdany