«Bereke» shaǵynaýdanynda «Nurly jer» baǵdarlamasy aıasynda 116 páterlik turǵyn úı paıdalanýǵa berildi.
Saltanatty sharaǵa oblys ákimi Qumar Aqsaqalov qatysyp, kóp jyldan beri kezekte turǵandarǵa páter kiltterin tabys etti. О́ńirde jyl ótken saıyn turǵyn úı qurylysy qarqyn alyp keledi. Byltyr bir myń páter berilse, bıyl 20 paıyzǵa artyq. Satyp alý quqyǵymen jalǵa berilgen páter kiltterine kópbalaly analar, jetim balalar, múmkindigi shekteýli jandar, memlekettik qyzmetshiler, áskerı sala ókilderi ıe boldy. Jıyrma jyl merzimge berilgen páter keıin jalǵa alýshynyń menshigine ótedi. Onyń qunyn merziminen buryn óteýge de bolady.
«Qazaqstan ıpotekalyq kompanııasy» aksıonerlik qoǵamynyń basqarýshy dırektory Arman Muqatov uıym Nurly jer» baǵdarlamasynyń operatory bolyp tabylatynyn, jyl sońyna deıin 96 páterlik taǵy bir úıdiń qonys toıy toılanatynyn jetkizdi. Aq jaýlyqty ana Altynshash Ramazanovanyń qyzy on eki jyl boıy páter jaldap kelse, endi eki baspananyń kiltine qol jetkizip otyr.
Turǵyn úıdiń jalpy aýmaǵy 9300 sharshy metrdi quraıdy. Astanalyq «Albat qurylys» JShS-i toǵyz aıdyń ishinde qurylysty aıaqtap, 850 mıllıon teńge baǵyttapty.
О́mir ESQALI,
«Egemen Qazaqstan»
Soltústik Qazaqstan oblysy