Qazaqstannyń asa daryndy boksshy Sadrıddın Ahmetov kásipqoı rıngtegi óziniń kelesi jekpe-jegin 7 qyrkúıek kúni Kanadanyń Edmonton qalasynda argentınalyq Brýno Leonardo Romaıǵa qarsy ótkizedi.
Áýesqoı rıngte Sadrıddın aýyz toltyryp aıtarlyqtaı tabystarǵa qol jetkizdi. Jastar býyny arasyndaǵy jarystarda jasyndaı jarqyraǵan ol birden qyraǵy mamandardyń nazaryn ózine aýdardy. Elshilik dodalarda dara talantymen oqshaýlanǵan jerlesimiz halyqaralyq arenada da myqtylyǵyn moıyndatty. Ásirese, 2016 jyly Bolgarııada ótken álem birinshiligi esimizde erekshe saqtalyp qaldy.
Tórtkúl dúnıeniń ár qıyrynan jınalǵan bylǵary qolǵap sheberleriniń básekesinde tórt jekpe-jek ótkizgen Ahmetov barlyǵynda jeńiske jetti. Alǵashqy aınalymdarda Lıtva men Qyrǵyzstan boksshylaryn uryp jyqqan ol jartylaı fınalda О́zbekstannyń jáne fınalda Ýkraınanyń órenderin kúmánsiz utty. Osylaısha, Sadrıddın 69 kılo salmaq dárejesi boıynsha jastar arasynda álem chempıony degen mártebeli ataqqa ıe boldy.
Kóp uzamaı daryndy jas kásipqoı rıngte baq synaýǵa bel býdy. Bıylǵy jyldyń sáýir aıynda Kanadanyń Kvebek qalasynda meksıkalyq Tonı Barreraspen judyryqtasyp, qarsylasyn 31 sekýndta uryp jyqty. Odan keıin mamyr jáne maýsym aılarynda argentınalyq Arıel Alehandro Zampedrıdi birinshi jáne Meksıkanyń taǵy bir ókili Gýstavo Garıbaıdy besinshi raýndtarda nokaýtqa jiberdi.
9 qyrkúıekte 20 jastaǵy Sadrıddın Ahmedov ózinen 10 jas úlken saqa sportshymen aıqasady. Osy kúnge deıin 26 kezdesý ótkizip úlgergen Brýno Leonardo Romaı 21 márte jeńis toıyn toılap, 18 qarsylasyn aıqyn basymdyqpen utty. О́ziniń sońǵy jekpe-jegin argentınalyq boksshy byltyrǵy jyldyń kúzinde Astanada qazaq jigiti Janqosh Turarovqa qarsy ótkizip, upaı sanymen ese jibergen bolatyn.
Ǵalym SÚLEIMEN,
«Egemen Qazaqstan»