Keshe elimizdiń Densaýlyq saqtaý mınıstrligi men Memlekettik qyzmet isteri jáne sybaılas jemqorlyqqa qarsy is-qımyl agenttigi ózara yntymaqtastyq týraly memorandýmǵa qol qoıdy.
Medısınalyq qyzmetterdi kórsetý sapasyn arttyrý, densaýlyq saqtaý salasynda sybaılas jemqorlyq kórinisterine jol bermeý – eldiń básekege qabilettiliginiń negizgi faktorlarynyń biri. Endeshe, vedomstvolardyń arasyndaǵy ózara is-qımyl eldegi jáne álemdegi sybaılas jemqorlyqtyń jaı-kúıi týraly aqparattar almasý, densaýlyq saqtaý uıymdarynda sybaılas jemqorlyq táýekelderiniń syrtqy jáne ishki taldaýlaryn júrgizý, sondaı-aq birlesken jobalardy, aksııalardy, semınarlar men keńesterdi ótkizý arqyly júzege asyrylatyn bolady.
«2017 jylmen salystyrǵanda, bıyl jaǵymsyz faktilerdiń tómendeý úrdisi bar. Máselen, 2017 jyly mınıstrliktiń Qoǵamdyq densaýlyq saqtaý jáne Farmasııa komıtetteriniń memlekettik qyzmetshilerine ádep qaǵıdalaryn buzǵany úshin 18 jáne memlekettik qyzmettiń bedeline nuqsan keltirgeni úshin 21 tártiptik jaza qoldanyldy. Al bıylǵy 7 aıda ádep qaǵıdalaryn buzǵany úshin 4 jáne memlekettik qyzmettiń bedeline teris áser etkeni úshin 1 tártiptik jaza belgilendi», dep atap ótti Densaýlyq saqtaý mınıstri Eljan Birtanov.
Al óz kezeginde Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev búgingi tańda adamı kapıtaldyń mańyzdy faktory úzdik densaýlyq saqtaý isi jáne deni saý ult bolyp otyrǵanyna toqtaldy. Sonymen qatar memorandýmǵa qol qoıýdyń erekshe ózektiligi men qajettiligi júrgizilip jatqan áleýmettik medısınalyq saqtandyrýdy engizý jónindegi reformaǵa, dárilik zattardy satý kezinde bólý jáne baǵalyq retteý salasyndaǵy reformaǵa da baılanysty ekendigin tilge tıek etti. Memorandýmǵa sáıkes, densaýlyq saqtaý uıymdaryndaǵy «turmystyq sybaılas jemqorlyqqa» yqpal etetin sebepter men jaǵdaılardy joıý sharalary iske asyrylmaq.
Dınara BITIK,
«Egemen Qazaqstan»