«Nur Otan» partııasy Tóraǵasynyń Birinshi orynbasary Máýlen Áshimbaev Astanadaǵy Kólik jáne kommýnıkasııa kolledji men qalalyq №5 kitaphanada bolyp, ondaǵy partııalyq jobalardyń júzege asyrylý barysymen tanysty. Áleýmettik nysandarda partııa bastamasymen qolǵa alynǵan ıgi isterdiń jaı-kúıine kóńil bóldi.
Búginde «Nur Otan» partııasy memleket basshysynyń tikeleı tapsyrmasymen partııa qyzmetin jańǵyrtý jumystaryn qarqyndy júrgizýde. Osy baǵytta 20-dan astam jańa joba qolǵa alynyp, júzege asyrylýda. Olardyń qatarynda sıfrlandyrýdy júzege asyrý, shaǵyn jáne orta bıznesti qoldaý jáne «Rýhanı jańǵyrý» baǵdarlamasyna baǵyttalǵan jobalar bar. Dálirek aıtsaq, «Sıfrly Qazaqstan» baǵdarlamasy boıynsha tegin IT-ortalyqtar men IT-synyptar ashylyp, IT-mamandar daıarlaý isi júıeli júrgizilýde. Respýblıka boıynsha úsh jyl ishinde ashylýǵa tıis 1000 IT-synyptyń 100-den astamy ashylyp úlgerdi. Olarda jylyna 8-16 jas aralyǵyndaǵy 150 myń bala baǵdarlamalaý, robot tehnıkasy jáne 3D modeldeý negizderi jaıynda tereńdetilgen bilim alady. Odan bólek, josparlanǵan 20 IT-ortalyqtyń 15-i ashyldy. Qazirdiń ózinde Astana qalasynda ashylǵan 11 IT-synypta 225 bala bilim alyp jatyr. Jyl sońyna deıin taǵy 73 synyp ashylyp, olar 4500-den astam balany qamtymaq.
Osyndaı IT-synyptardyń biri Astana qalasyndaǵy Kólik jáne kommýnıkasııa kolledjinde ashyldy. Búginge deıin munda 500-den astam azamat sıfrlyq saýattylyǵyn arttyryp, bilimin jetildirdi. Qazirgi tańda bul oqý ornynda 2500-den astam stýdent bilim alady. Sondaı-aq kolledjde «Qazaqstan Temir Joly» ulttyq kompanııasymen aradaǵy kelisim boıynsha dýaldi bilim berý júıesi engizilgen. Budan basqa kolledj «Qazaqavtojol», «Transtelekom», AREK, KEGOK sııaqty iri kompanııalarmen tyǵyz baılanys ornatqan.
Kolledjge arnaıy kelgen Máýlen Áshimbaev partııalyq jobanyń máni men mańyzyna keńinen toqtaldy. «Jobalardy sátti júzege asyrsaq, álemdik naryqtaǵy IT-qyzmetter otandyq mamandar úshin de qoljetimdi bola túsedi. Partııanyń bastamasymen aldaǵy úsh jylda jarty mıllıonǵa jýyq jas qazaqstandyq qazirgi zamanǵy baǵdarlamalaý tilderin men sıfrlyq tehnologııanyń qyr-syryn meńgeretin bolady. Olardyń qatarynda jumyssyz jáne ózin-ózi jumyspen qamtyǵan jastar da bar. Munyń barlyǵy búgingi zaman talaby. Sondyqtan osy múmkindikti tıimdi paıdalanyp, básekege qabiletti maman bolýǵa umtylýymyz kerek», - dedi ol.
Sonymen qatar partııa jumysyndaǵy basymdyqtardyń biri – «Rýhanı jańǵyrý» baǵdarlamasyna júıeli túrde qatysý. Soǵan oraı «Nur Otan» partııasy otandyq kitaphanalardy zamanaýı bilim ortalyqtary retinde qaıta quryp, olardyń jumysyn jandandyrý isin qolǵa aldy. Sonyń nátıjesinde biryńǵaı onlaın kitaphana júıesi qalyptasyp, elimizdegi barlyq kitap qory elektrondy formatqa kóshirilýde. Atalǵan bilim ortalyqtarynda jastarǵa arnalǵan qyzyqty leksııalar uıymdastyrylyp, pikirtalas alańdary jumys isteı bastady. Sondaı-aq jastardyń aǵylshyn tilin úırenip, jalpy bilimge degen yntasyn arttyrýǵa barlyq jaǵdaı jasalǵan.
Dál osyndaı tyń bastamalar Astana qalasyndaǵy №5 kitaphanada da júzege asýda. Kitaphanaǵa arnaıy kelip, ondaǵy tyń ózgeristermen tanysqan Máýlen Áshimbaev kitaphana oqyrmandary jáne qyzmetkerlerimen kezdesýinde jastardyń ǵylym-bilimge degen umtylysy zaman talaby ekenin aıtty.
«Joba boıynsha biryńǵaı onlaın-kitaphana júıesi qalyptasyp, oǵan barlyq otandyq kitaphanalar qosylady. Sol arqyly elimizdegi barlyq kitap qory ár qazaqstandyqqa qoljetimdi bolady. Shet tilindegi ádebıetter de qosylyp jatyr. Kitaphanalardyń jastardy tárbıeleý barysyndaǵy mańyzy óte zor. Mazmuny baı kitaptarsyz jaqsy bilim joq. Osy kitaptardy oqýǵa jastarymyzdy baǵyttaý – bizdiń mindetimiz»,- dedi partııa Tóraǵasynyń Birinshi orynbasary.
Búginde atalǵan kitaphanada qazirgi zamanǵy aqparattyq jáne elektrondy tehnologııalar keńinen engizilip, oqyrmandardyń túrli is-sharalar ótkizýine jaǵdaı jasalǵan. Jyldamdyǵy joǵary ınternet jelisine qosylyp, kitaptardyń elektrondy katalogy da júıeli jumys istep tur. Sonymen qatar partııalyq joba aıasynda taıaýda 18 elordalyq kitaphana men Qazaqstan Respýblıkasynyń Ulttyq Akademııalyq kitaphanasy arasynda memorandýmǵa qol qoıyldy. Sonyń nátıjesinde Astanadaǵy barlyq kitaphanalar biryńǵaı onlaın-kitaphanalar júıesine qosyldy. Bul óz kezeginde oqyrmandardyń qajet oqýlyqty tez ári ońaı tabýyna múmkindik beretini sózsiz.
Venera Túgelbaı,
«Egemen Qazaqstan»